Mga kargador nga badlongon

Dili lang diay mga dispatser ang nagpabadlong diha sa South Bus Terminal kondili lakip na usab ang mga kargador. Kini kon maoy atong tuohan ang mga sumbong nga atong nadawat. Dili hinuon ang tanan maoy nagpabadlong. Pero angay masumpo kining pipila ka badlongong mga kargador kay nakahasol sila ngadto sa mga pasahero.

Ang text nga akong nadawat nagkanayon: "Diha sa South Bus Terminal naay mga labor o kargador nga magbuot sa tag-iya sa kargamento. Bisan dili nimo ipaalsa ang imong karga, ila gyod nga alsahon. Unya magbuot sila kon pilay ibayad. Igo ra god ibutang ang kargamento sa baggage compartment sa taxi. Moarte ni sila panahon sa gabii." -- 0921-3407217 (Oct. 16, 2006 --10:33:10)

Binuang kining ilang gihimo. Nganong mamugos man sila sa ilang serbisyo bisan wala kini kinahanglana sa tag-iya sa kargamento? Hangyo-lubo diay kining ilang estilo. Pugsanay! Dakong tinonto. Ang angay nilang serbisyohan mao lang kadtong tag-iya og kargamento nga nagkinahanglan gayod nila. Dili kay mamugos sila. Ireklamo o isumbong ra god kana ninyo ngadto sa mga polis nga naa diha sa SBT.

* * *

Bahin sa basura" "Naa lang koy ireklamo bahin sa tigkuha og basura diri sa San Jose Village. Taronga ang inyong trabaho, uy. Sa una nga wala pa ilisi ang driver sa garbage truck maayo pa ang serbisyo kay gi-schedule man gyod nila. Pero karong nailisan na ang driver wala nay klaro kay panagsa na lang sila mokuha sa basura diri. Naa gyoy usa ka semana nga dili nila kuhaon ang basura. Kamiy nag-antos kay puwerteng daghana. Obligasyon man gyod tingali ni nila busa ila untang buhaton ang husto ug angay." -- 0919-8216567 (Oct. 16, 2006:19:09:10)

Dili lang una ko mokomentaryo mahitungod niini nga text. Ang ako lang ikasulti mao nga angay gyod nga may regular nga pagpangolekta og basura aron dili mangalisbo sa kabaho ang usa ka partikular nga dapit diin naay daghang basura nga kolektahonon. Maka-cause baya usab og sakit ang polusyon nga naggikan sa mga basura. Mao nga angay gayod himuon sa mga garbage collector ang ilang mga katungdanan.

* * *

(Sumbong ug reklamo? Text sa 0910-8105522)