Di pa gyud sila mo-give up; kinahanglang wa'ay eleksiyon!

Ngiga gyud nila uy! Tapus ibasura sa Labaw'ng Hukmanan ang ilang gitawag nga people's initiative nga gipasiugdahan ug initiated sa Malacañang, di pa gyud sila mo-give up, mao gyuy ilang gusto nga ipadayon ang cha-cha aron wa'ay eleksiyon, ug makapadayon sila diha sa gahom.

Mao kini ang main issue. Matud pa ni Neal Cruz sa Inquirer, ang real issue kuno bahin sa chacha controversy, mao ang pangutana kon nisalig ka ba, Dro, sa mga tawo nga buot mousab sa Konstitusyon. Karon, sila si de Venecia, ug lagmit kining atong mga Kongresista dinhi sa atong Sugbo, naningkamot nga ipadayon ang chacha ug sila ray magbuot-buot paghimo sa mga kausaban, pinaagi sa ilang gitawag nga Constitutional Assembly (Con-Ass).

Dili sila gusto sa Constitutional Convention (Con-Con) tungod kay ipaagi man ni sa eleksiyon, ug hadlok sila nga di unya makadaug, ug kon daghan unya ang makadaug nga dili nila sakop, dili na nila makontrolar ang Convention, ug dili na matuman ang ilang mga gusto nga makapadayon sa gahom.

Angay hunahunaon sa tanan nga kitang tanan, ikaw ug ako, Dro, gustog cha-cha, apan ayuhon, ug dili dalidalion. Ug labaw sa tanan, dili nato itugyan ang tanan ngadto sa present members of Congress, kay matud pa ni Neal Cruz: "The present legislators and politicians now in power cannot be trusted to do it without strings attached. The issue in the current controversy over Cha-cha can be summed up in one word: TRUST.

"We must have trust in the people who will write our charter. But that's the problem: We don't have trust the very people who want to do it now."

Nakabasa ba kaha ang atong mga Kongresista dinhi sa atong lalawigan niining column ni Neal Cruz. Sa ilang hunahuna, apil ba kaha sila sa giingon ni Cruz nga dili kasaligan?

Alang nako, husto ang sugyot sa oposisyon: Idungan nato pagpili karong umaabot eleksiyon sunod tuig, ang mga sakop sa Con-Con, aron inighuman sa eleksiyon, mao pay atong ihimog kausaban sa Batakang Balaud. Niining tungura, wala nay mga stings attached, wala nay mga hidden agenda, ug tungod kay pinili sa lungsod, makapaabot kita nga panglungsod ang tanan.

Alang nako, akong usbon, mao ni ang husto. Unsa kahay husto alang nila ni Cuenco, Del Mar, Soon, Gullas, Kintanar, Yapha, Martinez, ug Durano no?