Sulod lamang sa siyam ka minuto gibuhian ni Manny "Pakman" Paquiao ang 175 ka mga kinumo niini nga maoy nakapatikang-kang ni Erik "El Terible"Morales sa ikatulong hugna sa ilang away kagahapon didto sa Las Vegas, Nevada sa Amerika. Si Pakman ang migawas nga mananaug sa gitawag nga "The Grand Finale".
Tungod sa away ni Pakman ug El Terible, ang mga simbahan nahawan, ang mga drivers mihunong sa pagpamasada ug ang mga badlungon sa katilingban namahuway kay mitan-aw sa gikahinaman nga away sa duha ka mga banggiitang boksidor sa kalibutan. Sa kadaugan ni Pakman daghan ang nalipay, daghan ang daugan ug daghan usab ang nagmahay kay wa mosugal sa pustaanay, samtang ang uban didto mopusta ni Morales.
Tungod sa away ni Pakman ug El Terible, ang tibook nasud nga Pilipinhon nagkahiusa sa pag abiba ug pagsuporta kaniya. Ang mga politiko gibiyaan una sa makadiyot ang pamolitika ug gisuportahan nila si Pakman, sa laktod nagkahiusa ang tanan dinhi sa nasud.
Pagkaanindot kon kanunay nga adunay kahiusahan ang nasud, makab-ot na gayod seguro nato ang dugay na natong gitinguha-ang kalamboan ug timusbawan sa matag usa.
Awhagon sa hunta provincial si Presidente Gloria Macapagal Arroyo nga tun-an pag maayo ang kasabutan niining giintrahan tali sa Japan diin gitugotan ang maong nasud nga makalabay sa ilang mga basura dinhi sa Pilipinas agig katumbas sa pagsanong sa Japan nga makatrabaho ang atong mga nurses ug mga care-giver didto sa ilang nasud. Porbida ning administrasyong President Arroyo makalibog. Aron ba lang makatrabaho ang atong mga nurses ug care-giver didto sa Japan, mosugot lang ta nga ilang himuong basurahan? Kay ngano ang Japan lang ba diay ang makahatag kanila og trabaho? Ambot lang..