Kumpisal ka, padre?

Ang pagpangumpisal usa sa labing lawom ug makahuloganong kalihokan sa simbahan: Ang nangumpisal uban ang hingpit nga pagsalig mohukas sa tanang tabon sa iyang tanlag, kasingkasing ug pagkatawo ug motug-an ug mangayo og pasaylo sa tanang kasal-anan nga nakahasol niya; samtang ang pari, nga ning higayona mamahimo gyong tinuorayng representante sa Labawng Makagagahom, hingpit nga maminaw sa mga kalapasan nga gikumpisal, momaymay ug mohatag og penitensiya.



Ang kabalaanon sa pangumpisal gipanalipdan sa mga balaod sa nasud. Di mapugos ang usa ka pari sa pagtug-an sa kasayuran nga iyang nakuha gikan sa kumpisalan aron pagpatigbabaw sa saad sa simbahan nga ang pagkumpisal maoy pakigsulti sa Ginoo, pagpalig-on ug pagpalambo sa personal nga relasyon tali sa tawo ug sa iyang magbubuhat, ug busa di ni angayng isabwag ngadto sa kadaghanan.

* * *

Ang kabalaanon sa pagpangumpisal maoy nakapasamot sa kalang-og sa eskandalo sa pasangil sa kapin sa 20 ka babayeng mga tinun-an sa Abellana National School nga gihikap ang pribadong bahin sa ilang lawas sa usa sa pito ka pari nga nagpakumpisal nila human sa Life in the Spirit Seminar nga gipasiugdahan sa Oasis of Love.

Silang tanan giagbayan sa pari (nga wa mailhi hangtod ning atong pagsuwat, kay kinsa may mangahas pakig-ila-ila sa pari nga imong kumpisalan?), gipitik-pitik ang strap sa ilang bra ug gisuwayan gyod og kuot ang ilang dughan. Gilainan sila apan kinsa may mangahas sa 14 anyos nga mga batang babaye pagbadlong sa alagad sa simbahan, sa representante sa Ginoo dinhi sa yuta?

Nangreklamo na lang sila dihang gitambagan sa ilang mga ginikanan ug mga magtutudlo nga maoy ilang gisumbongan sa tanan human sa hitabo.

* * *

Ang pari gipasanginlan pa gyod nga nigamit sa kasayuran nga iyang nakuha sa kumpisalan alang sa kadudahan nga katuyoan. Pananglitan, usa sa mga babaye nikumpisal sa iyang bisyo sa pag-inom. Labihan na lang niyang kuganga kay inay badlungon gidasig na man hinuon siya.

Matod sa bata gihagad na man hinuon siya sa pari nga manuroy sila ug mag-inom. Gipakapinan pa gyod siya og pangutana kon nakasuway na ba og uyab. Gihimo ni sa pari samtang nag-agbay, nagpitik-pitik sa strap sa bra ug nisuway og kuot sa dughan sa bata. Mabasol bang mga tinun-an nga nagduda sa tuyo sa pari?

* * *

Unsaon man pag-ila ang pari? Sayon rang pag-ila sa pito nga nagpakumpisal. Apan kinsa man nila ang nangabuso sa pagsalig sa mga bata? Mokumpisal ba sab o, sama sa ubang gipasanginlan, motago una ug kon mailhan na mokisikisi dayon?

Mosugot ba silang paapilon og line-up aron ilhon sa mga bata? O igo lang ipatigbabaw sa kadagkoan sa simbahan ug sa eskuylahan ang pagdupa dayong Cebu City Schools Division Superintendent Leonilo Oliva nga nasayop lang ang mga tinun-an paghubad sa lihok sa pari?

* * *

Email: [email protected]