Leksiyon sa CICC

Mora'g insakto akong pangagpas nga lisod gayud mahuman sa gitakdang petsa niadtong Nobiyembre 15 ang konstruksiyon sa Cebu International Convention Center. Sa akong pagsulat niini usa ka adlaw human sa maong deadline, kamulo pa nga nagkumbati ang mga trabahante sa maong proyekto aron masakat kini atol sa Association of Southeast Asean Nations Summit sunod bulan.

Daan nang nanghinambog si Architect Manuel Guanzon nga mahuman gayud sa deadline ang pagtukod sa CICC. Matud niya atol sa usa ka interview sa The Freeman kaniadto nga layo ra ang Nobiyembre 15 kay sa Oktubre 31 pa lamang mahuman na ang maong proyekto.

Gani nakigpustaanay pa ang arkitekto batok niadtong nagduda sa kahumanan sa CICC sa gitakdang panahon. Hinuon si kanhi senador John Osmeña lamang ang mikubit sa iyang hagit sa dihang iyang gipatas-an ngadto sa P1.5 milyones ang iyang pusta.

Apan pasalamat si Guanzon nga wala madayon ilang pustaanay. Kay kon nadayon pa kadto, panington gayud ang arkitekto og sama kadako sa lugas sa mais pagpangita'g ikabayad sa iyang kapildihan.

Hinuon, dako ko'g pagtuo nga mahuman kini sa dili pa ang maong summit. Kay kon dili, dako'g tulobagon ang kagamhanan sa katawhan nganong nag-usik-usik lamang kini'g salapi alang sa proyekto nga dili diay mapuslan sa gitumong niining kalihukan.

Walay kwestiyon nga dili kini magamit sa maong internasyonal nga kalihokan. Gamay na lamang ang tiwasonon ug andam na kini nga mapuslan sa upat ka adlaw nga ASEAN Summit.

Ang dako lamang nga isyu niini mao ang paagi pagdali pagtukod sa maong proyekto aron lamang magamit sa labing dakong internasyonal nga katiguman sa Sugbo. Ug dili gayud malikayan nga daghan ang magduda sa kalidad unya niini tungod kay makaingon silang gidali kini pagtukod aron lamang makaabot sa apike'ng deadline.

Dili tiaw ang mga bisita sa Sugbo gikan sa Disyembre 11 ngadto sa 14 tungod kay mga pangulo sila sa pipila ka mga adunahang nasud sa kalibotan. Simbako kon ilang mahibaw-an ang kontrobersiya nga naglikos sa konstruksiyon sa maong convention center, dili kaha sila magduhaduha pagsulod niini?

Kon aduna pay modernong convention center ang Sugbo, dili na unta mosangpot sa dakong kontrobersiya ang pagpahigayon sa ASEAN Summit dinhi. Hapsay unta ang pagdumala sa Pilipinas sa mga kalihokang may kalabotan sa nagsingabot nga dakong katiguman.

Sa akong nang gikaingon sa nangaging mga kolum, insakto ang plano kaniadto ni kanhi gobernador Pablo Garcia pagtukod og usa ka world-class nga megadome alang sa mga dagkong katiguman dinhi. Usa kadto ka maayong plano pagpangandam sa Sugbo isip sentro unya sa mga dagkong convention ug internasyonal nga katiguman.

Apan unsay nahitabo sa maong plano? Nahimutang lamang kadto sa pagkalimot tungod kay gisakyan sa pamolitika sa Hunta Probinsiyal.

Tungod lagi sa pagbabag sa pipila ka bokal ilalum sa oposisyon, wala gayud maka-first base ang maong plano sa kanhi gobernador. Kay kon nakalusot pa kadto, dili na unta maglisod ang kagamhanan pagpangita og lugar alang sa ASEAN Summit.

Makapalambo usab unta kadto sa lokal nga turismo gumikan kay mahimo man kini nga usa sa mga atraksiyon alang sa mga bisita, lokal man o langyaw, kinsa buot mopahigayon og katiguman dinhi.

Hinaut nga ang atong lokal nga pangagamhanan nakakuha og leksiyon gikan niining makabungol nga kontrobersiya nga naglikos sa konstruksiyon sa CICC. Dili na unta mahitabo ang susama niini nga problema sa umaabot pang mga dagkong katiguman dinhi tungod kay makauuwaw kini alang sa mga Sugbuanon.

(Ipadala inyong reaksiyon sa [email protected])