Mas dakong uwaw

Human nasyut sa bolsa ang mga Sugbuanon sa sagol panginsulto nga panganti nga mahuman ang Cebu International Convention Center (CICC) sa Nobyembre 15, dunay pipila ka leksiyon nga angayng makat-onan sa tanang hingtungdan:

o Hinaot nga si Architect Manuel Guanzon mohunong na pagamit sa ngan sa Ginoo sa iyang mga panghambog kay way nahibawo unsa nay silot nga mahiagoman sa sunod nga paghimo sa labawng makagagahom nga saksi sa iyang track record;

o Hinaot nga si Gobernador Gwen Garcia mohunong nag tuo sa iyang kaugalingong propaganda ug mohunong nag panulisok nga way gugma sa Sugbo ang mga nanghatag niya'g sukwahi nga kasayuran; ug

o Hinaot nga ang katawhan makatuhog sa tinuoray'ng kahulogan sa diplomatikanhong mga pasumbingay, pananglitan ang ipasabot diay ni Ambassador Marciano Paynor sa "tremendous progress" sa trabaho sa CICC mao nga wa siya magtuong mahuman ni.

* * *

Atubangan sa pangangkon sa mga turutot ni Gobernador Garcia, wa sila bungkaga sukad sa eleksiyon sa 2004 ug dako ang kahigayonan nga gamiton na sab sa eleksiyon sunod tuig, nga 90% sa mga tigom sa Asean Summit ipahigayon sa CICC, ang Kapitolyo nameligrong mahiagom na sab og lain ug ning higayona mas dako pang kauwawan.

Karon pa lang gani giklaro na sa Malakanyang nga unya pa sa Nobyembre 28, atol sa kataposang tigom sa gabinete karong buwana, mohukom si Pres. Arroyo kun gamiton bang CICC alang sa summit. Aron di kaayo bug-at nga paminawon ang ultimatum, ang Kapitolyo nagdalidali pagpangayo og dugang 13 ka adlaw nga lugway aron kunohay motakdo ra sab sa tagal sa palasyo.

Gitirahan na hinuon silang Press Secretary Ignacio Bunye. Matod ni Bunye ang unang kasayuran nga ilang nadawat mao nga nahuman nang CICC apan dihang ilang gisusi hapit pa lang diay mahuman.

* * *

Duha ka sakop sa gabinete nisulti nako atol sa pagduaw ni Pres. Arroyo sa Malakanyang sa Sugbo niadtong Septiyembre nga way ministerial meeting nga himuon sa CICC. Ug usa sa mga direktang nahilambigit sa pagpangandam sa summit nipahibawo nako gahapon nga ang langyawng mga sakop sa media ray mogamit sa CICC atol sa summit.

Sa ato pa, dugay nang nahukman nga di gamiton ang CICC alang sa summit. Tingali kaikog ug pamolitika na lay nakapugong sa presidente ug sa iyang mga sinaligan pagbaraw sa padayong pangugat nilang Gobernador Garcia ug kaubanan nga ang CICC gyoy main venue sa summit.

O tingali piksan sa National Organizing Committee (NOC) nga gipangulohan ni Foreign Affairs Secretary Alberto Romulo ug usa o duha ka tigom ang CICC aron di hingpit mauwawan ang lokal nga mga politiko nga way kukaikog nga nanalipod sa laktod nga mga transaksiyon pinaagi sa pag-insistir nga tungod ug alang ni sa kadinalian ug kamakasaysayanon sa upat ka adlaw nga summit.

* * *

Email: [email protected]