Sikbit sa CICC

Pila lang ka eskina gikan sa kontrobersiyal nga Cebu International Convention Center (CICC), diin nasentro ang atensiyon sa lokal ug nasudnong kagamhanan, nga gawas sa gibanabanang P800 milyones nga magasto sa Kapitolyo alang sa building, dugang minilyon ka pesos gikan sa Mandaue City ug sa pribadong sektor ang gipabaha aron paglimpiyo, pagpanindot ug pagpalabong sa center island sa kadalanan palibot sa CICC, nahimutang ang usa sa labing hugaw, lang-og ug nangalisbo nga merkado sa tibuok kalibotan.

Ang karaang merkado publiko sa Mandaue kahawongan lang sa mega shabu laboratory sa paghingpit sa makauuwaw nga world record nga natumpi sa pamunoan ni Mayor Teddy Ouano. Ang pagpangiyugpos ni Ouano sa masulub-ong kahimtang sa iyang merkado maoy laing lig-ong sukaranan sa mga pagduda nga di kinasingkasing kon dili lunlon lang nga pagkabayo sa dakong kuwarta sa Asean Summit ang ilang pagpanlimpiyo.

* * *

Ang merkado publiko, nga maabot rag labay sa bato gikan sa Mandaue City Hall, maoy tinubdan sa pagkaon sa labing kabos nga mga molupyo sa Mandaue ug kasilinganang mga dapit. Mahimong wa kataak sa lapukon nga kadalanan palibot sa merkado ang gideklarar nga labing adunahang mayor sa tibuok rehiyon , ni ang mga sakop sa pinangga niyang pamilya, apan di ni igong hinungdan nga iya na lang pasagdan nga mameligro ang panglawas sa mga Mandauehanon.

Nakapamalit na ko makadaghan sa Carbon, Pasil, Taboan ug ubang mga merkado, maong mangahas ko pagtumbok sa merkado sa Mandaue nga maoy labing luod nga akong nasum-okan. Kamakaluluoy sa mga mamaligyaay ug mga mamalitay nga, ambot unsay ilang atraso, klarong gidumtan ug gipasagdan sa mayor.

* * *

Kon nagkaon ka, palihug tiwas una sa di pa mopadayon pagbasa. Kay ako nang ihulagway ang merkado dihang nangadto mi sa crew sa TV Patrol Central Visayas niadtong Biyernes sa udto:

o Kabahin sa gitadtad nga baboy natugsaw sa itom nga lapok;

o Kapaspas sa nanghimo og soriso karibalan lang sa kakugihan sa mga langaw nga nitapuko sa ginaling karne ug pinaugang tinai;

o Mga mamalitay nagtampisaw sa pilit ug lawom nga lapok kay way laing kaagian; ug

o Higanteng tam-ok sa basura nga nagtipun-og niadto sa palibot sa CICC maoy nakahingpit sa katalagman.

* * *

Atol sa Kulokabildo.Com sa Ayala Activity Center, gipatin-aw ni Junjie Gonzales, tigpamaba ni Mayor Ouano, nga mahuman nang bag-ong merkado sunod tuig kon maaprobahan ang bag-ong utang sa bangko nga gi-aplayan sa Mandaue. Matod ni Gonzales ang orihinal nga gahin alang ra sa foundation. Mao nga kon imong duawon ang luyong bahin sa Mandaue Sports Complex, pulos nahinuklog pang mga haligi ang nagtuyhad.

Sa kasamtangan, minilyon ka pesos ang gipabaha pagpaguwapa sa Mandaue alang sa summit apan way bisan usa ka dako sa paghimong luwas sa tinubdan sa pagkaon sa mga Mandauehanon.

Email: leo_lastimosa@abs-cbn.com