Panglubag sa mga hotel

Wala gyud kalikay ang mga hotel dinhi sa Metro Cebu sa pagpanghasi sa mga oportunista ug mapahimuslanon sa kahigayonan atol ning nagsingabot nga ika-12 nga Asean summit sa Disyembre 11 ngadto sa 14.

Miabot ngadto sa $200 ngadto sa $250 matag gabii ang rate sa mga hotel karon nga mas taas og $85 sa published rates niini.

Puwerteng layoa sa deperensiya sa rate sa atong mga hotel dinhi sa Metro Cebu kay sa rate sa mga hotel didto sa Malaysia diin didto gihimo ang ika-11 nga Asean summit. Kay sa Malaysia, $75 lang ang ilang rate matag gabii, sumala sa isyu sa Newsbreak magazine.

Ah! $200 ngadto sa $250, ikomparar sa $75 sa Malaysia? Puwerte gyud tuod layoa og deperensiya!

Kay mitaas og $85 ang rate, sa ato pa anaa ra unta sa $115 ngadto sa $165 ang published rate. Mas taas man gani gihapon sa Malaysia.

Bahala na og mas taas sa Malaysia, apan dili lang unta ingon ana ka dako sa $200 ngadto sa $250.

Sobra na pud gyud kaayo.

Garapalan na!

* * *

NANGUWARTA. Igo lang miingon si Ambassador Marciano Paynor Jr. kabahin sa "overpricing" sa mga rates sa hotel nga "we will look into that."

Unsa kahay tan-awon ni Paynor?

Wala gani siya magsulti unsay iyang baruganan niini ug kun aduna bay alternatibo nga pagabuhaton engkaso may masakpang hotel nga nagpa-overprice sa rates sa matag kuwarto niini magpahimulos sa nagsingabot nga Asean summit.

Unsa man ang buhaton sa organizing committee pananglit motiyabaw sa sobrang pagpanglubag sa mga hotel?

Silotan ba sa organizing committee ang indibidwal o grupo nga masakpang nanguwarta sa Asean summit?

Kun silotan, unsa may silot?

Pero taym pa! Walay gago nga management sa hotel nga mopataas sa rates kun walay nagsuntoy sa ilang sampot pagpataas niini.

Nagduda ko nga may mga indibidwal nga nakasulod sa organizing committee nga gustong manguwarta ug mao usab ang akong gidudahan nga nakigkunsabo sa mga hotel management aron paburoton og ingon kadakong presyo matag kuwarto.

Si Nagiel Bañacia, information officer sa Cebu City Hall ug usa sa mga tawo nga gihimong in-charge sa accommodation sa mga foreign media, "defensive" ra kaayo.

Sa report kagahapon sa The Freeman, si Bañacia misapalig nga walay makakuwarta sa pag-accommodate sa foreign media.

Paita pud nga reaksiyon! Nagpaila man hinuon.

* * *

PAUBSAN. Sakto si Philippine Chamber of Commerce and Industry Governor Robert Go nga makahatag og bati nga panig-ingnan sa Cebu ang overpricing sa hotel.

Maayong timan-an nianang mga tabaghak nga dagko nga gustong lang manguwarta sa Asean summit nga kanang mga pamuno-nasud ug mga ministro nga manganhi sa Cebu ug manambong sa internasyonal nga kalihukan susamang mga pamuno-nasud ug ministro nga mitambong sa ika-11 nga Asean summit sa Malaysia. Busa, dili kalikayan nga ilang ikomparar ang ilang kasinatian ug mga butang mahibaw-an dinhi sa Cebu sa ilang nakuha didto sa Malaysia.

Kun dunot atong ihatag nila niining Asean summit tungod sa pag-isip nato niining maong kalihukan nga "business opportunity" inay "long-term investment" dunot ra usab unya ang atong maani gikan sa ilang pagbisita dinhi.

Ang gipasiatab ni Marco Protacio, ang presidente sa mga kahugpungan sa mga hotel, resorts ug restaurants sa Cebu, nga "law of supply and demand" (nga sa ato pa kay daghan man ang manganhi aron mopuyo sa atong mga hotel, motaas usab ilang rates) usa ka argumento nga dili maka-justify sa bati unyang kadungganan nga atong gitisok sa alimpatakan sa mga ministro nga manganhi sa nasud atol sa summit.

* * *

PAS-AN NA PUD. Ang alkanse sa Cebu Private Power Corporation ipapas-an sa Visayan Electric Company ngadto sa mga kunsomedor.

Nagpasabot kini nga magpas-an na usab kita og dugang P0.1580 matag kilowatt hour nga pagpa-usbaw sa presyo sa kuryente.

Dugang na usab kining palas-onon. Gitayming pa gyud ang pagpatuman niini sunod bulan.

Mao kanay pinaskuhan sa VECO nato - ang alkanse sa CPPC kita nga mga kunsomedor ang papas-anon!

Sige pa kita'g brown-out, sakaan pa gyud ang presyo sa kuryente, imbes mi-ubos na unta ang presyo sa krudo ug gasolina unya mikubos na usab ang presyo sa dolyar.

Bisa'g unsaon, ang mga kompaniyang gipanag-iya og mga higanteng negosyo dili mapaling, kontrolado pa ang Energy Regulatory Commission mao nga dali kaayong okehan ilang pangayuong usbaw bisan walay paminaw-paminaw sa sentimento sa mga konsumedor.