Tingog sa kabos

Batan-ong sidewalk vendor nangutana atol sa Kapamilya Media Forum nga nagtuki sa kontrobersiyal nga upat ka adlaw nga holidays sa Asean Summit: "Nganong gi-exempt man dayon ni Pres. Arroyo ang exporters gikan sa holidays ug gibalibaran man ang kaliboan ka mga mamumuo ug gagmayng mga magpapatigayon nga nangayo sa samang proteksiyon?"

Si Michael Basubas, presidente sa Cebu Furniture Industries Foundation, diplomatikanhon nga nitubag nga igo lang silang nipadayag ngadto sa presidente sa ilang kahadlok sa dakong alkanse di lang sa ilang patigayon kon dili apil na sa ilang mga kawani kon apilon ang exporters sa holidays. Masaligon si Basubas nga ang ubang sektor makapadayag sab sa ilang mga sentimento pabor o batok sa upat ka adlaw nga holiday.

Apan paminawon ba sila? Ang mas tukmang pangutana: Makagahin bang presidente og kabahin sa panahon nga iyang gihatag sa dagkong exporters sa Sugbo aron pagpaminaw sab sa mga mamumuo ug gagmayng mga magpapatigayon?

* * *

Bisan ang ubang pundok sa dagkong mga magpapatigayon sa Sugbo nakaamgo nga di sila sama ka-suwerte sa exporters. Ang Cebu Bankers Club nagpalaban na lang ni Mandaue City Mayor Teddy Ouano, ang labing unang nisungay sa holidays nga gisugyot ni Cebu City Mayor Tomas Osmeña ug giaprobahan dayon sa Malakanyang, ug ang Cebu Chamber of Commerce and Industry didto na nagpahaba ni Gobernador Gwen Garcia.

Sa pikas bahin, ang kabos nga sidewalk vendors, mga mamumuo ug gagmayng mga magpapatigayon asa man mopadayag sa ilang pagsupak sa mas lig-on nilang mga argumento sa kagutom kay, samtang mahimong maalkanse ang exporters ug ubang dagkong mga magpapatigayon kon mahunong ang ilang operasyon, di gyong kakaon ang kabos nga mga pamilya tungod sa "no-work-no-pay-policy" nga segurong ipatuman kon mahinayon ang holidays sa Disyembre 11-14?

Di ba sila banghagan lang sa lokal nga mga opisyal nga di ganahang motan-aw sa naglago nilang bayhon ni mosingo sa pagpangalisbo nilag adlaw? Di ba pasiritan lang sila sa mga bombero kon mangahas pagpanuktok sa Malakanyang sa Sugbo?

* * *

Masulub-on ang hulagway nga gipintal sa ubang mga dinapit sa Kapamilya Media Forum sa DYAB Abante Bisaya ug Sky Cable nga gipahigayon matag Biyernes sa buntag sa SM City Entertainment Plaza:

• Si Atty. Ma. Theresa Calibugan sa DOLE 7 nipasabot nga ang bugtong kahigayon nga masuweldohan ang mga mamumuo atol sa holidays mao nga kon ilang makumbinser ang ilang employers paghatag ning sayong pinaskohan;

• Sila si Joy Lim ug Jessielou Cadungog sa ALU-TUCP niingon nga ang makaikyas sa "no-work-no-pay-policy" mao rang mga sakop sa unyon nga 5% na lang sa kinatibuk-ang puwersa sa pamuo; ug

• Si Maria Pino sa Cebu City United Vendors Association nahadlok nga kon di man sila palayason sa kadalanan atol sa summit wa lang gihapoy halin kay way suweldo ang kinabag-an sa mga mamumuo.

Email: leo_lastimosa@abs-cbn.com