Wa kauyon si Rama niini tungod kay samtang gipasigarbo ni Gayotin nga nikonhod ang gidaghanon sa kriminalidad sa dakbayan wa sad malilong ang dul-an na sa 200 ka mga vigilante-style killings nga hangtud karon wa gyud masulbad sa kapolisan.
Dunay punto si Rama nga di angayang manghambog ang kapolisan sa pagkonhod sa krimin tungod kay lalisonon pa kon sila bay hinungdan niini o ang kahadlok sa mga kriminal paghimo'g krimin tungod sa kabalaka nga silay isunod sa mga vigilantes.
Ang pagtoo sa kadaghanan mao nga nikonhod ang kriminalidad, kon tinuod ang pangangkon sa kapolisan, dili ni tungod sa epektibong programa ug kampanya sa kapolisan kon dili tungod ni sa presensiya sa vigilantes.
Busa alang ni Rama dili pahalipay ang angayang ihatag sa kapolisan tungod sa pagkonhod sa krimin kon dili angayan silang boohan. Gawas hinoon kon mangangkon ang kapolisan nga sila ra poy mga vigilantes nga responsabli pagpatay sa mga gidudahang kriminal.
Nakasabot kong trabaho ni Mayor Tomas Osmeña ang pagpili og hepe sa kapolisan sa dakbayan, apan wa ni magpasabot nga gidid-an ang bise mayor ug ang mga sakop sa konseho paghimo og rekomendasyon ngadto sa mayor kon wa na silang kaayon sa performance sa hepe.
Nasayod ko nga usa ka rasonable nga pagka-opisyal ang mayor ug nga andam kining maminaw sa sugyot sa mga sakop sa konseho kon alang sa kaayohan sa dakbayan. Busa ang angayang buhaton ni Rama mao ang pagduol sa mayor ug isugyot ang paghulip ni Gayotin kon tinud-anay nga wa na siyang kaayon niini.
Sigurado kong tulin pa's manatad ang pagbalhin ni Gayotin kon tinguhaon sa dakbayan ang pagpahulip niya. Kini tungod kay gawas nga "overstaying" na siya sa pwesto dako og bargaining power ang syudad tungod sa dakong hinabang nga gihatag niini ngadto sa kapolisan.
Ang PNP dunay lagda nga ang mga officer-in-charge duna lay tour of duty sud sa unom ka buwan samtang mamili pa ang mayor kon kinsay kwalipikado nga mohupot sa pwesto. Apan si Gayotin dugay rang nag-unom ka buwan sa iyang pwesto, busa kon tinguhaon sa mayor nga hulipan siya sa pwesto mamahimo kaayo kini.
Gawas niini di kaakong kadagkuan sa kapolisan pagsupak sa gusto sa mayor kay mamiligro ang ilang gidawat nga hinabang. Mamahimo kaayong bawion sa dakbayan ang mga bag-ong sakyanan, gasoline allocation ug monthly incentives nga gihatag niini ngadto sa kapolisan kon di tumanon ang gusto niini.
Busa dako ang akong pagtoo nga ang pabiling paglingkod ni Gayotin diha sa CCPO kabubut-on sa dakbayan. Kon unsay hinungdan, taliwa sa kamatuoran nga dili siya kwalipikado sa pwesto ug sa wa pagkatagbaw sa mga sakop sa konseho sa iyang performance si Gayotin ra ug ang mayor maoy nasayod.