Lakang ni Alarcio

Dayag nga suportado sa mga Muslim ang programa ni Chief Supt. Silverio Alarcio Jr. pagpatuman sa kahapsay ug kalinaw tumong sa pagpangandam sa Asean summit.

Gituyoan ni Alarcio ang mga lugar diin magpuyo ang kaigsuonan natong mga Muslim.

Timailhan kini nga gitunol sa kapolisan ang mga kamot niini ngadto sa mga Muslim aron pangayuon ang espiritu sa panagtambayayong aron matuman ang gipangandoy natong kalinaw sa umaabot Asean summit.

Dagko usab kaayo og "smile" ang kaigsuonan natong mga Muslim pagdawat ni Alarcio ug sa mga uban niining mga opisyal nga nagpailang gidawat nila ang pagduol sa kapolisan ngadto kanila aron patabangon sa kampanya pagsumpo sa bisan unsang panghitabo nga maghugawhugaw unya sa summit.

Usa lamang sa nakahan-ay nga programa ni Alarcio ang pagduaw sa mga pinuy-anan sa mga Muslim sa Ermita ug isla sa Mactan.

Laing programa nga iyang gipatuman ang total gun ban atol mismo sa mga adlaw nga ipahigayon ang summit.

Nagpasabot kini nga wala gyuy tawo nga tugotan nga makadala og armas sa mga adlaw nga himuon ang panagtigum sa mga pamuno-nasud sa Association of Southeast Asian Nation (ASEAN).

Bisan kadtong mga gun-holder nga adunay mga permit to carry outside residence (PTCFOR) did-an nga makabitbit sa ilang armas.

Wala kana magpasabot nga yam-iran lang sa kapolisan ang PTCFOR. Ang paghupot og armas, ug ang pagdaladala niini gawas sa pinuy-anan, dili katungod sa tawo. Usa lamang kini ka prebilihiyo nga mahimong bawion sa gobyerno kun adunay rason.

Ang total gun ban mahimong i-justify sa pulong "national security" nga kinahanglang ipatuman ngadto sa labing taas nga panginahanglanon aron maangkon nato ang dungog nga angay nato human niining internasyonal nga panagtigum sa mga pamuno-nasud.

Nagtuo ko nga uban niining pagpatuman sa total gun ban ang pagpatuman sa agresibo nga pagpangharang sa kadalanan alang sa checkpoint.

Kadtong masakpang magdala og armas nianang mga adlawa, impas ka!

* * *

POLIS VS. SUNDALO. Wala ko makasabot nganong gipadako pag-ayo ang isyu labot niadtong duha ka tenyente ug duha ka enlisted personnel sa kasundalohan nga gidakop sa kapolisan sa Lapu-Lapu human giingong mibabag sa karsada sa gisakyan niining multicab.

Simple ra gyud kaayo ang maong isyu -- dunay upat ka sundalo nga gisita sa usa ka polis unya nangasuko ug giingnan ang polis nga mas hawod sila kay sundalo sila unya polis lang ang nagbadlong nila.

Human makitang gibukbok nila ang polis, miduol ang mga estambay ug mikulata sa mga sundalo, apil na ang duha ka batan-ong tenyente, hangtod gipangdakop sila sa kapolisan sa Lapu-Lapu ug gibalhog.

Ambot og agi ba og pagtahod sa militar, si Supt. Louie Oppus mibahar pud sa iyang paglaban sa iyang tawo nga si PO2 James Ariel Fuentes. Gi-release hinuon niya silang 2Lt. Edgardo Batinay, 2Lt. Randy Sotero, Cpl. Reynaldo Pallado, ug PFC Dimas Capinig nga wala gyuy kaso nga gipasaka bisan nakalawgaw kini sa "local peace" sa Lapu-Lapu nga iyang hurisdiksiyon.

Pustaanay pa, wala gyuy kasong mapasaka batok sa duha ka sundalo ug duha ka opisyal, samot na nga mismo si Sr. Supt. Vicente Loot mipugong nga dili mapasaka ang kaso, samtang nagpaabot sa resulta sa imbestigasyon sa National Bureau of Investigation.

Si PO2 Fuentes na hinuon ang makaluluoy tungod kay girelibohan sa Lapu-Lapu Police Station ug tua gibutang sa Cebu Provincial Police Office (CPPO).