Para kuno sa Simbahan

Usa sa labing bantayanan karong panahona mao kining mga mangingilad nga mogamit sa ngalan sa Ginoo aron paglukmay sa balatian sa ilang prospect. Daghan na kaayo ang naghimo niining maong matang sa modus operandi. Mga batan-on ug hamtong, babaye ug lalaki, ang naghimo niini.

Ang estilo mao nga mosulod sila sa mga buhatan, sa mga internet cafe, sa mga balay ug uban pang mga dapit diin adunay daghang mga tawo (public places). Magdala silag sobre ug ipresentar kini ngadto sa ilang prospek dungan ang pagpadayag sa ilang tuyo: mangayo og hinabang o donasyon para (kuno) sa simbahan.

Sa ibabaw sa sobre nahisulat sa dagkong mga titik ang mga pulong "Halad Alang Sa Simbahan" pero walay detalye kon unsang simbahana o parokya ang nagpasiugda sa pagpangolektag donasyon. Wala ganiy address nga ibutang sa ubos. Aduna hinuon ing bersikulo nga kinutlo sa Bibliya nga nagkanayon: "Hatag aron ikaw pagahatagan."

Kamong dali rang malukmay ang balatian, angay kamong magbantay. May nabiktima na niining maong tinonto. Usa ka babaye ang nanungko sa kabalayan ug nanghatag og sobre nga pasudlan og kuwarta isip donasyon (kuno) sa simbahan. Usa sa mga parokya dinhi sa dakbayan sa Sugbo ang gigamit sa mangingilad. Gitawagan sa biktima ang maong parokya aron pagkompirmar kon nangolekta ba gayod silag donasyon o may sinugo ba sila sa pagpangolektag donasyon. Nahisagmuyo ang biktima kay ang nakatubag sa iyang tawag sa telepono miingon man nga wala sila magsugo ni bisan kinsa sa pagsuroy aron mangolekta og donasyon.

Sa ato pa, dakong pangilad ginamit ang ngalan sa Ginoo. Pagbantay gayod kamo niining maong estilo sa modus operandi.

* * *

Sa laing bahin: "Good day, Sir. Aduna koy pangutana bahin sa Court of Appeals. Mabayran ba sila? Nangutana ko niini, Sir, tungod kay adunay case sa NLRC nga ningdaog ko. Pag-abot sa CA napilde ko." -- 0916-4275930 (Aug. 22, 2006-12:13:09)

Kon maoy ipatigbabaw ang kaligdong, nagtuo kong dili mabayran ang CA. Bahin sa imong kaso, may mga hitabo gayod nga ingon niana kon inig-review sa CA kulang kini sa merito. Mao bitaw kanang adunay korte sa apelasyon.

(Sumbong ug reklamo? Texte sa 0910-8105522)