Di pa sila mo-give up!

Tungod lagi kay di gyud sila gustong mohawa sa gahom, kay sama ni Marcos, gusto silang moabot silag at least 20 ka tuig sa gahom, kay nindot kaayo, di gyud sila mo-give up, bisan pa sa ruling sa Korte Suprema pagbasura sa ilang tinguha to perpetuate in office, pinaagi sa chacha ug sa ilang gitawag nga initiative kono sa katawhan.

Mohimo pa silag mga lakang aron di gyud maka-eleksiyon sunod tuig, ilabina nga sa mga survey nakita nga lat-an sila sa oposisyon karong Mayo. Ug di sila makatugot nga sa Hunyo sunod tuig wa'a na sila sa gahom.

Imagine, wa'a na sila sa gahom. Kon ikaw moy sila, Dro, sugot kaha ka? Unya, kon wa'a na sila sa gahom, kon ipadayon ang mga imbestigasyon sa giingon nga pagpamakak, panikas ug pangurakot, unya, lain na ang Ombudsman, lain na ang Sandiganbayan, wa'a na si Sec. Gonzales sa Hustisya, mabali na ang "numbers" sa House of Representatives -- mag-unsa na lang sila?

Sa Senado, pananglitan, nag-una si Loren Legarda sa survey. Gisundan sa mga incumbent senators sa oposisyon ug sa independent-minded nga mga administration senators. Gani, nasulod pa man si Sonny O. sa top 20, bisan kon ang ubang mga Sugbuanon nasuko na niya.

Naghulagway lamang kini nga medyo mangharos ang oposisyon sa umaabot nga eleksiyon. History repeats itself. Atong hinumduman pagpangharos sa Nacionalista batok sa Liberal niadtong panahon diin nasuko na ang katawhan sa incumbent Liberals.

Maoy hinungdan nga kinahanglan wa'ay eleksiyon. Daghan kaayong mga tulobagon ang mga incumbents nga ukiton sa lungsod. Ug dili sila gustong muatubang niini.

Gihugonhugon nga ang Sigaw ng Bayan (ambut kinsa nga bayan) ug ang ULAP (ambut kinsa ni sila), maghuwat nga mo-retire si Chief Justice Panganiban, ug mao pay ilang i-file sa motion for reconsideration.

Niining tungura lahi na ang hulagway sa Korte Suprema. Mabakante ang usa ka position pagka-Justice. Ug kon ang ipuli ni Panganiban, ug ang bag-ong Justice, maikog ni Gloria, mahimo nga ma-reverse ang hukom sa Labaw'ng Hukmanan.

Ug kon kini mahitabo, wa'a na tay mahimo, duko tang tanan kay Labaw'ng Hukmanan god. Wa'a nay eleksiyon, padayon sila sa gahom. God bless the Philippines na lang.