Maayo pa ang mga patay aduna pay kalinaw

Karong adlawa atong gisaulog ang adlaw sa mga patay human usab nato sauloga ang adlaw sa mga santos kagahapong adlawa. Sa probinsiya maoy naandan sa katawhan ang pagbisita sa ilang mga minahal sa kinabuhi nga mitaliwan na ngadto sa laing kalibutan niini karong adlawa samtang sa mga siyudad kasagaran Nobiyembre 1 ang ilang pag bisita sa ilang mga patay.

Suwerte kaayo ang mga patay nga nahinumduman sa ilang mga kabanay nga buhi pa ning kalibutan tungod kay aduna pay makahimo sa pag ampo alang sa kaluwasan sa ilang mga kalag apan dimalas kaayo kadtong mga patay nga wa nay naghandum kanila.

Sa kalibutan sa mga buhi anaa ang mga kabalaka nga adunay mamatay kon ugaling molihok na usab ang mga mahigugmaon sa kagubot sama sa mga terorista hinungdan nga sobsob kaayo ang pagbantay sa atong mga otoridad sa seguridad sa katawhan nga mibisita sa ilang mga mahal sa kinabuhi nga mitaliwan na ngadto sa laing kalibutan ning pagsaulog nato sa adlaw sa mga patay.

Maayo pa ang mga patay kay di na mahadlok nga mamatay ug anaa na kanila ang hingpit nga kalinaw.

Nakontinto ang hepe sa kapulisan dinhi sa sugbo police superintendent Melvin Gayutin sa mga pagpasabot ni police superintendent Eliseo Castronuevo, hepe sa station 5 nga nagbasi sa Carbon, barangay Ermita ning dakbayan kini may kalabutan sa 35 ka mga video karera ug moli-moli nga nasakmit sa mga sakop sa CIIB ug laing mga police units. Matud pa ni Gayutin nga sukad sa paglingkod ni Castronuevo kaniadtong Abril hangtod Oktubre isip hepe sa station 5 ubay-ubay sa mga video karera machines ang nasakmit sa iyang mga tawo. Sobsob kuno ang kampanya ni Castronuevo batok sa illegal nga sugal diha sa iyang area sa barangay Ermita.

Porbida nimo supt. Gayutin motoo kalang dayon sa rason ni Supt. Castronuevo? Tinood daghang tawo diha sa barangay Ermita pero dili dako kanang maong barangay nga dili dayon makit-an ang mga illegal nga sugal kon ugaling gitinood man niini ang pagwagtang sa maong matang sa sugal. Kon sobsob pa ang kampanya ni Supt. Castronuevo sa video karera nganong miabot pa man og 35 ka mga makina sa video karera ang nasakmit sa mga sakop ni Labra ug mga kaubanan? Ang 35 ka mga video karera nga nasakmit nila ni Supt. Paul Labra maoy buhing kamatooran Supt. Melvin Gayutin nga natulog sa pansitan ang imong hepe sa Station 5 nga si Castronuevo. Ilarang lolo nimong upaw Supt. Melvin Gayutin, ayaw ang mga sugboanon ilabi na ang mga taga barangay Ermita.