Nausahan na pud ang kapolisan

Pagkamakaluluoy gyud diay niining mawad-an kita og cellphone.

Kagahapon, akong de kamera nga Nokia 6280 kolor itom nga gisulod og crystal casing nahibilin sa taksi nga Jo-Lee nga Toyota Vios nga gimaneho sa medyo gulangon nga bulagaw og buhok (apan wala gyud nako makuha ang plate number) samtang nagpaingon ko sa Palace of Justice sa Kapitolyo gikan sa atubangan sa University of Cebu sa may Colon.

Pagsulod nako sa opisina ni Judge Geraldine Econg aron mokuha og pasulit, didto na nako mamatikdi nga wala na diay nako ang gibitbit kong cellphone hinungdan nga mikaratil ko'g dagan balik pa-gawas sa pamasin nga maapsan pa nako ang taksi, apan wala na gyud nako maapsi pa.

Milahos ko'g dagan nga nagkadulusingot paingon sa Bizdepot sa Cocomall aron mangita og payphone. Apan sa dihang gitawgan na sa operator, igo lang mo-ring.

Ikatulo nga dial, gi-on apan igo lang naminaw, dili gyud motingog.

Nawad-an na sa paglaum, mibalik ko sa Kapitolyo ug didto naabtan pa nako ang service vehicle sa GMA-7. Gihangyo ko si Jun Veliganio nga i-dial ang akong number nga 0927 3218015, apan "unattended" na.

Wala gyud kitay mahimo gawas sa paghangyo sa nakapunit nga drayber o pasahero sa pag-uli sa cellphone bisan nganhi lang sa buhatan sa Banat News o tawagan ang telepono 253-1276 o 253-8613.

Adunay ganti nga mapaabot ang mo-uli.

* * *

TULIS. Gi-demalas ang Visayan Electric Company sa Mandaue tungod sa pagkabiktima niini sa tulis kagahapon ug nawad-an og P1.7 milyones.

Apan angayang tawgon og demalas niining hitaboa ang kapolisan tungod kay bisan giunsa nila sa pagpahigpit sa seguridad tungod sa umaabot nga Asean summit sa Disyembre, malutsan lang gihapon sila nianang mga karahong mga tulisan.

Hain naman diay ang intelligence fund nga gitagana sa mga lokal nga kagamhanan ngadto sa kapolisan? Asa man kaha kini nila gihapak?

Nganong aduna pa may mga tulisan nga makalampos sa hinanggaw nilang mga binuhatan?

Mao bitaw usahay nga kanang mga biktima sa tulis, panguot o kawat mangyam-id na lang kun ingnon "isumbong sa polis" kay nasayod naman gyud nga may pagkabanga gyud kining kapolisan.

Diha naman unta kadtoy warning nga gipagawas ang Criminal Intelligence and Investigation Bureau (CIIB) pinaagi ni Supt. Pablo Labra III nga adunay mga banggiitang tulisan gikan sa Ozamis city nga manganhi dinhi sa Sugbo aron mangigo.

Sa laktod nga pagka-estorya, gi-balewala ra diay sa ubang yunit sa kapolisan ang maong warning.

O nausahan lang gyud ang kapolisan?

Pero hain naman diay na'ng panghambog sa kapolisan nga gihigpitan nila ang seguridad tungod lagi sa umaabot Asean summit?

Nganong aduna pa may mga panghitabong ingon niini nga mahimo ra unta kining matiktikan kun kusogkusog pa lang unta ang intelligence capability sa kapolisan?

* * *

KALAG-KALAG. Magsaulog na usab kita karong adlawa sa adlaw sa mga santos ug ugma adlaw sa mga kalag.

Tipik na sa tradisyon natong mga Pilipino nga mangadto sa mga sam-ang aron pagduaw sa mga mahal nato sa kinabuhi nga mitaliwan na sa laing kalibutan.

Apan, maayong magbantay kita batok sa mga karahong mga akyat bahay gang. Naghulat ra gyud na sila nga mamingaw atong balay ug mosunod dayon sa pagpanghakot sa atong mga butang nga mahimo pa'ng halinon.

Si Konsehal Procopio Fernandez, tsirman sa Police Committee sa Konseho sa dakbayan, mipagawas na og pahimangno kanato sa pagbilin og tawo sa atong mga panimalay engkaso og mangadto sa sementeryo.

Gawas niana, bantayanan usab kaayo ang mga mangunguot sa mga sementeryo. Mangita ra ba gyud kana sila og tayming kanus-a kita malipat. Malipat lang gani kita og gamay, mabalhin dayon sa ilang mga kamot atong mahalong butang sama sa cellphone o pitaka.

Wala gyud kitay laing mahimo gawas sa pagmabinantayon!