Kabalaka tungod sa korupsyon

Niining adlawa, ang tagsulat ania sa Beijing, China alang sa usa ka kombensyon sa mga nagka lainlaing nasud batok sa korupsyon. Ang Pilipinas nagpadala og mga delegado nga gilangkoban sa mga kadagkoan sa Ombudsman, sa prosekusyon, Presidential Assistant batok sa korupsyon, sa Bureau of Immigration, PDEA, Bureau of Customs, Department of Foreign Affairs, usa ka kongresista ug usa ka inilang mayor sa Metro Manila. Ang Pilipinas ang labing dako nga delegasyon, ug mao ang bugtong nasud diin upat ka delegado ang gihatagan og mga dagkong katungdanan sa maong kombensyon. Ang uban nga nasud, lakip na ang Amerika, Alemanya ug Inglatera, tag-usa lamang ka mamumulong.

Sobra sa 130 ka nasud ang mipadala sa ilang kadagkoan aron pagtambong sa maong kombensyon. Maayo kaayo ang pag-abiabi sa China sa mga delegado, nga dinhi nila ipahimutang sa Grand Epoch City, usa ka dakong pasilidad nga nahimutang sobra sa 50 ka kilometro gikan sa downtown sa Beijing, nga mikopya sa mga nagkalain-lain nga palasyo sa mga emperador sa panahon sa Ming ug Qing dynasty.

Kasagaran sa mga delegado nagpadayag sa ilang mga balaod batok sa korupsyon, bahin sa kalisdanan nga ilang nahiaguman sa pagsumpo sa korupsyon, sa mga posibleng hinungdan sa korupsyon, ug ang ilang gipangbuhat batok niini.



Aduna usay mga kabalaka tungod kay dili lalim ang pag-gukod og mga dagkong isda, samtang ang uban nabalaka sa ka- sinsero sa mga gitahasan sa pag-away niini.

Ang mga nasud, labi na ang China, nagpakita sa ilang kabalaka sa korupsyon tungod kay kini dako og epekto sa kalibutanhong politika ug ekonomiya sa mga nasud.

Adunay mga nasud sa Europa ug Aprika nga bag-o pa lamang nakahimo sa ilang mga balaod batok sa korupsyon. Diha usay mga nasud nga nagpahungaw sa ilang mga kalisdanan sa pagsanta sa korupsyon.

Ang Indonesia mipahayag nga ang ilang nasud mao ang usa sa labing corrupt nga nasud sa kalibutan, apan aduna na silay mga konkretong gipangbuhat batok niini. Ang Singapore usab nagpadayag sa ilang garbo isip ikalima sa tibuok kalibutan nga dili corrupt nga nasud.

Kon ikomparar sa ubang nasud, mas dako ang gigahin ang atong nasud aron pagsumpo sa korupsyon. Mas daghan kitag ahensya nga gitahasan sa pagsumpo niini. Mas daghan ug mas maayo ang atong mga balaod batok sa korupsyon. Kining mga puntoha ang gipamahayag sa atong mga mamumulong sa Pilipinas. Gawas niini, dili pa kita makapanghambog sa kalibutan kon unsay atong agi aron pagsumpo sa korupsyon.

Alang sa inyong mga panahom ug reaksyon, palihug e-mail sa [email protected] o text sa 0915-5536986. Daghang salamat.