Hulga sa huwaw

Ang pasidaan sa nag-ung-ong nga huwaw sugod sa Enero sunod tuig makapanlimbawot sa balhibo. Apiki nang daan ang mga mag-uuma tungod sa wa mabadlong nga rice smuggling dinhi sa Sugbo, gikahadlokang makulban na gyod sa ilang mga kaldero kon mahinayon ang El Niño nga gipasidaan sa Pag-asa.

Ang pagsakmit sa mga operatiba sa CIDG 7 sa smuggled rice nagmatuod nga wa pa gyod mabadlong ang kahiwian sukwahi sa pangangkon sa kadagkoan sa Bureau of Customs. Tungod sa pagbaha sa mas baratong bugas gikan sa ubang kanasuran, napurdoy ang daghang basakan sa atong silingang mga lalawigan nga maoy tigsuplay nato og bugas. Bisan ang mga nagtikad og mga utanon nahulga sab sa pagsiaw sa pagpayuhot og mga utanon pinaagi sa langyaw'ng mga barko nga nagpakaaron-ingnon lang nga gi-baradero dinhi sa Sugbo.

Kon nagtakilid nang mga mag-uuma karon, kinsa may mopugong sa ilang hingpit nga pagkahagba kon tiwasan na sila sa huwaw sa bag-ong tuig?

* * *

Usa ka sakop sa gabinete ni Pres. Arroyo, nga wa mabantog sa iyang kamatinud-anon, nitino sa pipila ka sakop sa media nga nagkatapok sa Malakanyang sa Sugbo nga seguro nang motambong sa Asean Summit karong Disyembre silang US Pres. George Bush ug British Prime Minister Tony Blair. Matud niya si French Pres. Jacques Chirac na lay wa pay klaro, apan dako ang kahigayonan nga magpakita sab dinhi sa Sugbo.

Usa ka sakop sa Senado, nga beterano sa nangaging Asean Summits, nitug-an sa DYAB Abante Bisaya og sukwahi nga kasayuran: Magpada ra si Bush og mga representante atol sa summit. Matud niya kon moanhi pa si Bush, may giparada na untang US warship sa Mactan Channel, kay wa man igdungog ang Estados Unidos nga motugyan lang sa Pilipinas ug ubang kanasuran sa seguridad sa ilang commander in chief.

* * *

Laing mga tilimad-on nga iyang gihisgutan:

o Si Bush sukad pa sa una niyang termino mas ganahan nga motambong sa mas dako nga APEC (Asia-Pacific Economic Conference) Summit kay sa Asean; ug

o Dihang niulbo ang krisis sa nuclear test sa North Korea, gipada lang ni Bush ang iyang national security adviser nga si Condoleeza Rice sa mas dagko nilang alyado sa Asya-Japan ug South Korea-maong di maayong tan-awon kon mokalit lang siya og butho sa Sugbo.

Duna koy ipuno nga ikatulong timaan nga di moanhi si Bush sa Sugbo: Ang Marriott Hotel nga mao ray Amerikanhong hotel dinhi sa ato, kay di man mahitabo nga supakon ni Bush ang lagda sa iyang kagamhanan ug adto siya puyo sa Marco Polo o Shangrila, way tinuyo nga pangandam alang sa summit, nagkarakara na unta karon pagpa-guwapa kon umaabot pa ang pangu sa labing gamhanang nasud sa kalibotan.

Email: [email protected]