Himulbolan ang minatay

Makugang tingali kamo ug dili makatuo niining akong hisgotan karon. Gibase ko kini sa usa ka sumbong nga akong nadawat gikan sa usa ka magbabasa kinsa miangkon nga siya mismo usa ka tagtungod og minatay nga nakasinati niining maong estilo sa modus operandi. Mihangyo hinuon siya nga dili lang ibutyag ang iyang cellphone number mao nga tagoon ko na lang kini isip 0916-581xxxx.

Sumala sa iyang gi-text kanako, mahitabo ang maong matang sa modus operandi sulod sa morgue sa mga ospital. Miasoy ang atong texter nga niadtong bulan sa Septiyembre giatake sa sakit ang iyang kapikas sa kinabuhi hinungdan nga ila kining gidala sa usa ka tambalanan nga ania ra sa Metro Cebu. Gihatag niya kanako ang kompletong ngalan sa maong ospital apan mihukom kong dili lang una ibutyag kini.

Sa akong pagsabot sa iyang text, nakabsan gayod sa kinabuhi ang iyang kapikas. Natarantar siya sa maong kalit nga hitabo. Naguol ug nabalisa siya maong wala na siya nahinultol kon unsay angay niyang buhaton. Didto na sa morgue ang minatay sa dihang giingnan siya sa duha niya ka helper nga ipatangtang ang mga alahas nga gisul-ob sa iyang kapikas sa kinabuhi nga naalaot.

"Pagtan-aw nako wala na man ang wedding ring ug kon wala pa ko magyawyaw dili gyod to nila ibalik," nagkanayon ang atong texter nga daw mibati og kahisagmuyo. "Patay na gani ila pa gyong kawatan. Daghan man ang nireklamo nianang hospital. Mahal pa unya kon naa kay alahas mangawala pa. Kuyaw kaayo nang hospitala kay kon matarantar ang tagtungod sa minatay ilang pahimuslan ang higayon."

Haskang paita kon tinuod man ugaling kining maong alegasyon. Bisan wala pa koy personal knowledge bahin niini pero 75% na kong motuo niini. Wala man god koy nakitang sukaranan nga magtumo-tumo lang ang atong texter. Mao nga bantayanan kini. Angay sab kining susihon sa mga tagdumala sa mga ospital aron masuta kon wala ba maghimog tinonto ang ilang mga trabahante, ilabi na ang nadestino sa morgue. Tiaw mo ba nga lakip ang minatay himulbolan pa sa mga alahas? Aw, dili hinuon tingali tanang mga tambalanan may badlongong trabahante nga naghimog ingon niini.

* * *

(Sumbong ug reklamo? Text sa 0910-8105522)