Usa ka texter ning lindog nagkanayon: "Good day, Sir. Gusto lang nakong i-aware ang public kabahin nianang mga lalaki nga dagko og lawas nga magdala og dagko sad nga bag nga walay sulod. Sagad mosakay sila sa PUJ nga O1K, 21B ug sa mga jeep magbiyahe og Labangon. Mga mangunguot na sila. Pagbantay intawon mo nianang mga tawhana. I-safety gyod ang inyong pitaka ug cellphone aron dili mo mabiktima. Salamat." -- 0919-8725864 (Sept. 28, 2006 -- 13:11:06)
Kon magsakay mog PUJ, kinahanglang alerto kamo kanunay aron makabantay kamo sa bisan unsang milagro nga posibleng himuon sa mga badlongon sa katilingban sulod sa PUJ. Samtang magdagan ang inyong gisakyan, panid-i ninyo sa hilom ang mga kauban ninyong pasahero sulod sa sakyanan. Kon may mamatikdan kamong kadudahan ang mga lihok, bantayi ninyo siya. Ilabi na gayod kon ang maong tawo nagdala og dakong bag apan maila nga walay sulod.
Mao man god kini ang sagad nga buhaton sa mga mangunguot sulod sa PUJ. Magdala silag dakong bag pero walay sulod. Kini ang himuon nilang salipod samtang magpahigayon na sila sa pagpanguot sa bag o bolsa sa gikatupad nilang pasahero. Mao nga ayaw gayod kamog kompiyansa kon may ikasakay kamong tawo nga magdala og dakong bag apan walay sulod. Posibleng usa siya ka mangunguot.
Timan-i ninyo ang mga rota sa PUJ nga maoy sagad sakyan niining maong mga mangunguot. Sumala sa atong texter, ang mga rota nga 01K, 21B ug ang biyahe para Labangon maoy sagad nga sakyan niining maong mga mangunguot. Kinahanglang magmaigmat gayod kamo kanunay aron dili kamo mabiktima sa mga badlongon sa katilingban.Kinahanglang alerto kamo 24 oras.