EDITORYAL — Walay puas nga pagpasalamat

Kaniadto ang mga magtutudlo dinhi sa Sugbo mohuwat pa'g binuwan una sila makadawat sa ilang suweldo gikan sa Central Office sa Department of Education sa kaulohan.

"Dugay kaayo namo madawat ang among paycheck," matud sa usa ka maestra. "Ug usahay kun dunay sayop ang computation, adtuon pa ni namo sa Manila aron ma-corrected."

Hasul ug gasto kaayo.

Naluwas na karon sa maong problema ang mga Sugbuanong magtutudlo. Salamat sa balaod nga gipangamahan ni Rep. Jose "Dodong" R. Gullas, sa Unang Distrito sa Sugbo, diin ang pagpanuweldo sa mga magtutudlo gi-decentralize na.

Tungod niini walay puas ang pagpasalamat ang madawat ni Sir Dodong Gullas gikan sa mga magtutudlo. Ug gikalipay usab sa kanhi kongresista ang maong pagpasalamat sa, matud niya, gamay'ng tabang nga iyang nahatag sa mga magtutudlo.

Kami manghinaut nga ang balaod ni Sir Dodong -- ang Republic Act Regionalizing the Department of Education Payroll Service Division -- hingpit nga mapatuman dili lang dinhi sa Central Visayas kundili sa tibuok nga nasud.