Waswas sa NBI?

Bahaw ang labing dakong bahin sa pasiunang report sa National Bureau of Investigation (NBI) nga ilang gisumiter ngadto ni Labor Secretary Arturo Brion. Kaanugon sa upat ka buwan nga kulbahinam nga pagpaabot sa tibuok nasud nga igo ra man diay nilang gi-recycle ang kasagaran sa kasayuran nga nabisto nang daan pila ka adlaw human sa kontrobersiyal nga nursing licensure examination (NLE) niadtong Hunyo ning tuiga.

Kadudahan pa gyod kon ang final report nga ilang isumiter ni Brion karong semanaha ug ang mga kasong ilang irekomendar ngadto sa Department of Justice (DOJ) sunod semana makabarug ba sa hukmanan. Si NBI Director Nestor Mantaring gikahadlokang tua kapusta sa pikas kay kuwang na lag dyutay nga moangkon nga wa silay klarong mga ebidensiya ug mangayo og pasaylo sa 17 ka mga opisyal nga ilang ilambigit sa leakage.

* * *

Ang bugtong bag-o sa report sa NBI mao ang ilang pag-absuwelto sa mga opisyal sa Professional Regulation Commission (PRC) gikan sa eskandalo. Sukwahi ni sa nahaunang pasangil nga labing menos duha ka dagkong opisyal sa PRC ang nakigkonsabo sa mga utok sa leakage. Gikahadlokan nga lain na sab ning tilimad-on sa kalig-on gyod ni PRC Chairperson Leonor Tripon-Rosero, ang personal nga dentista ni Pres. Arroyo, ug sa ubang mga opisyal nga iyang giduphan.

Ang ubang bahin sa report igo lang ni-recycle sa mga pasangil nga duha ka sakop sa Board of Nursing (BON) ang tinubdan sa leakage, tulo ka nursing review centers ang nagpakatap ini ngadto sa ilang reviewees, Tests 3 ug 5 ug Baguio ug Metro Manila ray naapektahan.

Tungod sa kanihit sa bag-ong kasayuran, gidudahan nga ang kalangay sa pakisusi sa NBI gitumong sa pagpahuyang inay pagpalig-on sa kaso batok sa mga responsable sa kahiwian.

* * *

Ug busa naa ron sa mga abaga ni Brion nahan-ok ang lisod nga gimbuhaton paghukom imando bang retake o ipatigbabaw nang sangpotanan ug kalimtan na lang ang mga pagduda sa kaligdong sa NLE. Apan human sa way kinutobang balitok ang tilimad-on gikan sa Malakanyang klaro na: Way retake.

Ang pagbasura sa retake madawat lang sa mga hut-ong sa katilingban nga igo lang sang nibarug alang sa kaligdong kon dasonan sa tinuoray'ng paggukod sa mga sad-an ug paghimo og kausaban sa PRC ug ubang ahensiya nga motino nga di na masubli ang eskandalo.

* * *

Anhi masukod ang kamatinud-anon ni Pres. Arroyo pagsulbad sa krisis. Di niya mahimong lahugayon ang PRC nga di maapiki si Rosero ug ang uban niyang mga batabata.

Di mahimong tinud-on paggukod ang mga utok sa leakage nga di mobalik sa iyang mga tinudlo sa PRC. Ug kon tinud-on sab paggukod ang pakauwaw sa iyang mga tinudlo, mabanhaw sang mga pangutana nganong padayon mang gilikay-likayan ang mas dagkong mga pangutana sa kaligdong sa iyang pamunoan?

* * *

Email: [email protected]