Dentista ni Glo

Karon nahibawo nang tibuok nasud nganong di kabadlong si Pres. Arroyo sa naghuramentado nga pangu sa Professional Regulation Commission (PRC), kansang pagpabaya maoy hinungdan sa leakage sa mga pangutana pila ka adlaw sa wa pang nursing licensure examination (NLE) niadtong Hunyo ning tuiga. Si PRC Chairperson Leonor Tripon-Rosero mao diay tiglimpiyo ug tig-atiman sa mga ngipon sa presidente.

Kinsa may makalalis sa presidente kon alang niya mas kahadlokan nga barinahan ni Rosero ang iyang lingagngagan kay sa tanang impeachment complaints nga ipasaka sa oposisyon ug sa uban pang mga pasangil sa sekretong bank accounts sa Germany nga luwatan ni Kongresista Alan Peter Cayetano?

* * *

Apan niabot nang adlaw sa paghukom ni Rosero: Di siya mahimong magpadayon pagpamangka sa duha ka sapa. Angay siyang mopili: Magpabilin bang tiglili sa nagnganga nga baba sa presidente?; o magpadayon ba pagduma sa mga pasulit sa nursing ug ubang mga propesyon sa nasud?

Kay naklaro na nga si Rosero di takos nga magsul-ob sa duha niya ka kawo. Klarong bilib ang presidente sa kamaayo ni Rosero pag-atiman sa iyang mga ngipon. Kay kon wa pa, dugay ra untang namutos ang dentista. Ang gikaintapang kataray sa presidente nipalayas na unta si Rosero sa wa pa siyang kaluwat sa iyang labing unang insulto batok sa presidente ug sa mga opisyal nga niduyog sa iyang way kinutobang balitok sa retake sa NLE.

Ambot kon dako ba lang ang problema sa mga ngipon sa presidente, o nahurot nang panahon ni Rosero pagpabilib sa presidente pinaagi sa pag-exhibition sa iyang baba, angay'ng pahibaw-on ang presidente nga pulos nangalisbo ang naghitak nga kauwawan nga way pupanaganang gipabuhagay ni Rosero sukad sa pagkabisto sa leakage.

* * *

Panahon nang ibton ni Pres. Arroyo ang iyang paboritong dentista gikan sa katungdanan. Kay kon magpabilin pa si Rosero sa PRC, mosamot pang ngutngot ug malangay kon di man hingpit nga mapakyas ang paghingo sa eskandalo sa NLE nga nakapahimutang sa krisis sa kaligdong di lang sa nursing kon dili sa uban pang mga propesyon.

Pipila sa nagkataas nang listahan sa mga "atraso" ni Rosero:
• o Pagdalidali niya pagpapanumpa sa board passers aron pagsabotahe sa pagpugong sa Court of Appeals (CA) sa oath-taking tungod sa mga petisyon pagbasura sa sangpotanan sa NLE;
• Pagtanyag niya pagtudlo og examination writers dihang namalibad ang iyang mga gitanyagan nga mohulip sa nabakanteng mga lingkoranan sa Board of Nursing (BON);
• Pagsupak niya sa sugo sa iyang pasyente, si Pres. Arroyo, nga ipaubos ang PRC sa Department of Labor and Employment (DOLE);
• Pagsalikway sa laing sugo sa iyang pasyente sa partial retake sa NLE; ug
• Pagtakda og ultimatum sa Malakanyang pagtarung sa nag-usab-usab nilang baruganan kay kon dili iyang papanumpaon ang board passers unya sa Oktubre 19.

* * *

Email:leo_lastimosa@abs-cbn.com