Pasakay ra diay?

Ug, sa makausa pa, nanglipaghong na sab sa kauwaw si Pres. Arroyo. Giisnab sa National Bureau of Investigation (NBI) ang iyang sugo nga isumiter nang sangpotanan sa upat na ka buwan nilang pakisusi gahapon. Ang report unta sa NBI maoy tukion sa tigom sa gabinete karong adlawa aron maklaro na, human sa labing menos tulo na ka balitok, ang baruganan sa presidente sa retake.

Ang NBI, nga ubos sa buhatan sa presidente, way kukaikog nga niinsistir nga tumanon nilang orihinal nga schedule nga unya o sa di pang Oktubre 15 (wa bay nakahunghong nila nga adlaw ning Dominggo?) ipagawas ang ilang final report. Si Atty. Efren Meneses, anti-fraud chief sa NBI, morang nang-lecture sa Malakanyang sa pagpasabot nga duna pay dugang mga ebidensiya nga kuhaunon ug mga saksi nga mohatag sa ilang mga testimoniya busa di pa katak-opan ang imbestigasyon.

* * *

Kay killjoy mang NBI, unsa may mahitabo sa tigom sa gabinete nga dumalahon ni Pres. Arroyo karong adlawa? Makigbuno na ba sab si Dante Ang, ang labing pinangga nga NCLEX lobbyist, sa iyang mga magtatambag nga nakapalubag sa presidente paglangay sa retake? Sublion ba gihapon ni Ang ang iyang alas nga NCLEX o sagolan na og pamuyboy sa dako niyang amot sa kontrobersiyal nga kampanya sa presidente sa mas kontrobersiyal nga eleksiyon sa 2004?

O magbinasolay na bang mga sakop sa gabinete nganong wa kapugni ang presidente sa pag-apil-apil sa labad-sa-ulo-ra-unta-sa-PRC nga retake? Inay ang liderato ra unta sa PRC ang naapiki, salamat sa matag-karon-ug-unya-nga-kataphaw-nga-motumaw-sa-Malakanyang-human-sa-bangis-apan-hingpit-nga-pagluba-sa-duha-na-ka-pagsuway-sa-impeachment, karon ang retake gilumpong na sa masuk-anong board passers ug ilang mga ginikanan (nga pulos mga botante, apil nang mga gipasidunggang-nakapadaog-sa-presidente-nga-mga-Sugbuanon) sa ilang pagsiyagit og recount sa sangpotanan sa eleksiyon sa 2004.

* * *

Usa ka inilang abogado sa Sugbo nitambag sa Sugbuanong board passers sa pagsugod na pagsaulog. Gipasabot mi niya nga samtang di ni mabantang og sulti ni Pres. Arroyo, tungod ni Ang ug sa ubang gamhanang mga pundok nga niawhag sa retake, apan tino na nga way retake nga mahitabo.

Ngano? Kay gawas sa report sa NBI, gihimong kundisyon sa Malakanyang sa pagpahigayon sa retake ang pagpaabot sa hukom sa Court of Appeals (CA). Nga kon makapakanaog na sa iyang hukom sa petisyon nga namasangil nga gi-whitewash sa PRC ang imbestigasyon sa leakage karong tuiga segurong kuwestiyunon sa maapiki nga partido atubangan sa Korte Suprema.

* * *

Kon mao, di diay banga si Pres. Arroyo. Makapa-guwapa siya pagpangangkon nga nisuway pagluwas sa nursing profession. Ug busa di na kahan-okan sa responsibilidad pagbuong sa kaligdong di lang sa eleksiyon kon dili sa kinatibuk-an nang natad sa katilingban.

Apan magpasalamat gihapon niyang board passers kay way retake nga mahitabo. Ang tulisukon mao ang mga hukmanan nga, sama sa naandan, nibaraw sa pagbarug unta sa presidente alang sa katarung.

Email: leo_lastimosa@abs-cbn.com