Ang dalan sa kalampusan

Atong higala, si Boy Odilao, mora mag na-anghelan na ni siya karog maayo, mipadala kanatog laing text message nga makapahinoklog ug makapamalandong. Ania, akong ipaambit ninyo:

"No one has traveled the road to success without ever crossing the path of failures. God never promised us an easy journey of life, only safe arrival."

Tinuod, di ba? Pangutana ni bisan kinsa nga nagmalampuson sa ilang kinabuhi, nga wala moagig mga katalagman ug mga kapakyasan. Gawas kaha niadtong mga tikasan ug mga kawatan, sayon alang kanila, ang ilang giagian. Hinoon, tungod kay waa may permanente ning kinabuhia, waa sad mahibawo kon unsa ang linugdangan niining ilang pagkatikasan ug pagkakawatan.

Anyway, niadtong nagtinarong sa ilang pagpuyo ug pagpanginabuhi, ang dalan paingon sa kalampusan, tunokon gyud. Ug sa gikutlo ni Odilao, waa mosaad kanato ang Ginoo sa usa ka hapsay ug haruhay nga pagpuyo ning kinabuhia. Ang iyang gisaad ang safe arrival lang, o maayong pag-abot.

Ang problema sad kon asa ta muabot. Maoy gusto sa Ginoo ang safe arrival, apan, kon asa abut, kita na ang magbuot. Ug kon asa ta abut, mag-agad kon giunsa nato pagpuyo ang kinabuhi nga gipahuwaman nato sa Ginoo.

Sa ato pa, kon imong gipuy-an ang imong kinabuhi sa sigeng pamakak, panikas ug pangawat, hinungdan nga pulos kalipay ug waay suliran ang imong kinabuhi, puno sa gahom, di ta makaseguro kon ma-safe ba ang imong arrival ug kon asa sad ka mo-arrive.

Asa ta mo-arrive, ato na ni, waa nay labut ang Ginoo ini. Maoy hinungdan nga aron ma-safe ang atong arrival, magtinarong ta ning kinabuhia. Kay kanang gahom nga imo karong gihuptan, Dro, ang tanang kabtangan nga imong pinaspasan, ang imong mga panggukod sa imong mga kaatbang, ang imong mga panglupig ug pamintaha, ang imong mga panglimbong ug panikas, kining tanan maoy agdon kon asa ka mo-arrive.

Busa, ayaw, ikahiubos ang mga kasakitan nga mobabag kanato sa atong pagpadulong sa unahan. Kabahin kini ning kinabuhia. Dili kini kalikayan. Ug kadtong misuway paglikay niini, pinaagi sa dautang mga buhat, mas dautan ang iyang dangatan, ug mas grabe ang iyang arrival.

Salamat Boy sa imong mensahe.