Matod pa sa kapitan nga dili tinood ang pasangil sa mga police ngadto kang Tude kana tungod kay aktibo man gani kini sa kampanya sa ginadiling drugas diha sa ilang barangay.
Gipanghimakak usab ni kapitan Imok Rupinta ang taho sa kapulisan nga pabilin gihapong anaa sa top 5 ang iyang Barangay sa pinakadaghan og tigpayuhutan og ginadiling drugas sa mga Barangay dinhi sa siyudad sa Sugbo. Matod pa niya nga tulo na lamang ka mga tawo ang nagpayuhot og ginadiling drugas diha sa Barangay Ermita.
Kon tinood pa kapitan nga aktibo sa kampanya batok sa ginadiling drugas ang imong SK Chairman nga si Carlo Magno Tude, nganong nasakpan man kini sa akto nga mibaligya og shabu ngadto sa mga sakop sa CIIB nga mihimo og buy bust operation kaniadtong Domingo? Basin gilingla ka lang sa imong SK Chairman kapitan? Basin ang gihimo sa imong SK chairman mao ang aktibo nga kampanya niini sa kabatan-onan diha sa imong Barangay sa pagpamalit og shabu ngadto kaniya ina kay kampanyahan kini sa pagdili paggamit niini?
Unsa ning akong nadungog kapitan, tulo na lamang ka tawo ang namaligya og ginadiling drugas diha sa imong Barangay? Kon mao ni, kaila diay ka ning mga tawhana kay nakaihap man ka nila? Unya unsa may imong gihimo ngadto kanila? Imo nang gitaho ngadto sa kapolisan ang ilang mga pangalan aron kini maoperasyonan o imo lamang gitagoan ang nahipos nimong kasayuran aron sila maprotiktahan?
Pastilan kapitan, misuol napod nang imong pagkabakakon. Ako pa nimo, makig-alayon ka sa atong kapolisan dinhi sa Sugbo aron malimpyohan nang imong Barangay sa mga nagpayuhot og ginadiling drugas dili kay imong dupa-dupahan nang imong SK Chairman nga nasakpan sa akto sa mga police nga namaligya og shabu.
Porbidang looya sa mga batan-on diha sa Barangay Ermita, ina kay giyahan sa ilang SK chairman ngadto sa dalan sa katarong nahisalaag na hinoon ngadto sa dalan sa kadaot. Di pa gyod igo, ina kay tabangan ug luwason ni kapitan Imok Rupinta ang mga batan-on sa Ermita kay nahakuyog sa dautang giya, ang gihimo sa kapitan mao na hinoon ang pagdupa-dupa ngadto sa dautang giya.