Nabiktima sa peke

Sublion ko sa pagpahimangno kaninyo nga magbantay gayod batok sa modus operandi sa mga badlongon sa katilingban nga nagpakaylap sa mini nga kuwarta. Kini tungod kay sa matag karon ug unya makadawat man ako og sumbong dinhi sa akong lindog gikan sa daghang nabiktima sa peke nga salapi.

Laing biktima niining maong modus mi-text nga nagkanayon: "Biktima sab ko nianang peke nga P500. Hapit na sab unta ko mabiktima sa P1000 nga peke pero kay nakabantay na man ko, wala ko madala. Nag-motorsiklo sab ang maong tawo, bangason, mopalit unta og imnonon. Paghatag sa P1,000.00 bill, klaro kaayo nga peke kay dili mao ang pirma ni Arroyo. Ako rang usa diri sa akong tindahan maong wala ko makaresponde dayon. Magbantay na lang gyod ta." -- 0917-4925652 (July 12, 2006 -- 11:55:44)

Maayo gani kay nakabantay ka na. Atong awhagon ang atong kaigsuonan nga magbantay gayod niining mga mangingilad nga mag-motorsiklo, bangason ug magpasumangil og palit unya peke nga salapi maoy ibayad. Susiha sab ninyo ang pirma sa Presidente sa kuwartang ibayad kon wala ba kini mao-maoha.

* * *

Ako nang gikonsulta ngadto sa higala nakong abogado ug sa lain pang higala nakong retired colonel ang bahin niadtong hulga nga akong nadawat nga gipaagi sa text gikan sa cellphone number 0928-7549397. Ila nang gitun-an kon unsay legal nga action nga among mahimo batok niini.

Nakadawat man god kog hulga gikan sa maong cellphone number niadtong Hulyo 15, 2006. Ang text nag-ingon nga puyde ko niyang ipapatay sa hilom. Ginganlan pa kog tonto sa nag-text. Kon tonto man ko, ikaduha ra kong tonto kay sa nag-text nako og hulga.

Namalihog na sab ko sa akong asset kalabot niini. Kining akong asset maoy nakatabang pagsulbad niadtong higayon nga nakadawat pod kog hulga niadtong 2004. Siyay nagsusi ug natultolan gyod. Siya poy nagdisiplina niini. Karon, gipalihok na sab nako siya.

(Sumbong ug reklamo? Text sa 0910-8105522)