Deadlock sa Sugbuak

Sama sa gipaabot sa kadaghanan nahimong mainiton ang lantugi kon angayan bang ibalik ang Sugbuak bills ngadto sa House committee on local governments o dili nga diriyot gyud moresulta sa panagsinukmagay nilang kongresista Antonio Cuenco sa dakbayan sa Sugbo ug ni Emilio Macias sa Negros Oriental niadtong Miyerkulis sa hapon.

Wa kapugong si Macias sa mga insulto nga iyang nadawat gikan ni Cuenco tungod sa pagdumili niya nga tukion ang motion for reconsideration nga giduso nilang Cuenco may labot sa pag-aprobar sa komitiba ni Macias sa Sugbuak bills niadtong Agosto 9.

Tungod sa iyang kapikal gisuspenso ni Macias ang hearing ug midasmag ni Cuenco apan dali kining napugngan sa ilang mga kaubang kongresista.

Ang gipakitang taras ni Macias angayang susihon sa liderato sa kongreso tungod kay dako kining kauwawan sa ilang institusyon. Lupig pay wa katungtong sa tunghaan ang gipakitang kabarumbado ni Macias atol sa hearing.

Ang iyang gihimo nagpakita lang nga wa siyay respito sa ilang institusyon nga alang nako angayang di palabyon sa liderato sa kongreso. Angayan gyung imbistigahon si Macias sa ethics committee aron magsilbing ihimplo sa ubang mga kongresista sa umaabot.

Kon way bilib si Macias sa iyang kaubang kongresista gikan sa Sugbo tungod kay wa siyay respito niini apan angayang wa niya kalimti ang respito alang sa institusyon nga iyang girepresentahan.

* * *

Dako ang purohan nga di gyud gihapon kairog ang tulo ka mga balaudnon nga nagtinguha pagbuakbuak sa lalawigan sa Sugbo bisan pa sa pagdumili ni Macias nga tukion ang motion for reconsideration. Kini tungod kay magpabilin sab nga di matandog ang iyang committee report didto sa committee on rules tungod sa pagpugong sa mga kongresista nga supak niini.

Sa ato pa magpabilin ang deadlock tali sa duha ka kampo nga alang nako mas pabor alang sa mga nisupak tungod kay posibling maabtan ni sa eleksiyon sunod tuig. Kon kini mahitabo wa nay purohan pa ang maong mga balaudnon tungod kay kinahanglan man nga kini isang-at pag-usab sa sunod nga kongreso.

Apan tungod kay mogradwar naman ang mga proponents nga sila si Clavel Martinez, Antonio Yapha ug Simeon Kinatanar karong Hunyo 30. Busa inay nga kondinahon si Macias sa mga kongresista nga supak sa Sugbuak bills tungod sa iyang pagdumili nga tukion ang ilang motion for reconsideration angayan hinuon nila kining pasalamatan tungod sa pabor nga iyang gihatag ngadto kanila.

* * *

Seguradong maapeke ang tinguha ni Cuenco nga awhagon ang ilang partido nga mohimo og party stand batok sa Sugbuak bills tungod sa pagtapon sa usa sa mga proponents sa ilang partido.

Si Kintanar mitapon na sa Lakas gikan sa NPC gani misugod na ni og tambong sa meeting sa ruling party Lakas-NUCD niadtong Miyerkulis sa gabii didto sa dakbayan sa Quezon. Si Kintanar miingon nga giimbitar siya ni House speaker Jose De Venecia nga motapon sa ilang partido.

Si Kintanar mihimakak nga may kalabutan sa plano ni Cuenco nga awhagon ang partido Lakas paghimo og party stand hinungdan nga mitapon siya. Apan bisan sa pagpanghimakak ni Kintanar, admitido si del Mar nga seguradong maapeke ang plano nila pag-awhag nga mohimo og baruganan ang Lakas sa maong isyu.

Matud ni del Mar nga seguradong babagan ni Kintanar ang plano pag-awhag sa liderato sa partido nga mohimo og stand batok sa Sugbuak bills.

* * *

E-mail: fplanguido@yahoo.com