Load ang target

Naay pangilad pinaagi sa text nga ang load sa cellphone maoy tuyo. Kining maong estilo sa modus operandi dili hinuon pang-bigtime o dinagko, pero alang sa gustong magdaginot sa ilang load, kini usa na ka dakong puwerhisyo. Mao nga mas maayo nga masayod kamo niining maong estilo sa modus aron makabantay kamo ug dili malingla sa mga badlongon sa katilingban.

Usa sa nakasinati niining maong modus mao ang tag-iya sa cellphone number 0910-3980994. Wala hinuon siya mailad kay nakabantay man siya. Ang nagpadala kaniya og text mao ang cellphone number 0910-4476998. Makaingon kong "maru" ang tag-iya niining maong numero tungod kay gusto man siyang makabaton og load ang iyang cellphone nga dili makagasto sa kaugalingon niyang kuwarta.

Nganong nakaingon man ko niini? Tungod kay ang tag-iya sa cellphone number 0910-4476998 mi-text ngadto sa tag-iya sa cellphone number 0910-3980994 og congratulatory message. Giingnan niya ang naulahi nga nakadaog (kuno) kini og load gikan sa Smart. Yamat ra! Smart pay gipasanginlan!

Aron (kuno) ma-claim ang load nga nagkantidad og P500, i-type lang ang 0910-4476998, unya space, unya 15, unya ipadala ngadto sa 808. Maayo gani kay nakabantay ang tag-iya sa cellphone number 0910-3980994. Kay kon iya pang gituman ang instruksiyon nga gihatag sa nagpadala kaniya sa congratulatory text, seguradong makuhaan ang iyang load og P15 ug ma-pasaload kini ngadto sa 0910-4476998.

Klaro kaayo nga ang load maoy target sa tag-iya sa cellphone number 0910-4476998. Kon nalipat pa ang tag-iya sa cellphone number 0910-3980994, seguradong makuhaan gayod ang iyang load. Balikon ko, ginagmay ra kining maong modus pero bisan pa man, makamugna gihapon kinig kahasol ngadto sa atong kaigsuonan.

Alang sa tanang mga magbabasa, bantayi ninyo kining cellphone number 0910-4476998 kay basin mo-text usab kini kaninyo og congratulatory message nga panglingla lang. Gusto lang siya nga maka-pasaload kamo ngadto sa iyang cellphone. Mao nga ayaw kamo palingla sa text gikan niining numeroha.

* * *

(Sumbong ug reklamo? Text sa 0910-8105522)