Kinsay mabdos, kinsay nagbuwag?

Mao kini ang mga pangutana sa atong mga TV entertainment ug tsismis shows sa atong nasud. Ug kining maong mga TV shows, daghan kaayong manan-aw, ug kanunay'ng mo-rate sa mga survey nga himuon.

Ug tungod kay mo-rate, daghan kaayo ang mo-advertise, daghan ang mo-sponsor, sa ato pa, daghang kwarta alang sa mga TV companies, mga producers, ug sa mga TV personalities mismo, ilabina sa mga hosts.

Maoy hinungdan nga kon manglansar ang maong mga TV personalities, di lang kay segurong mudaog, kondili, mahimutang pa gyud sa top five.

Mao kini ang sitwasyon karon sa atong nasud. Mogasto tag minilyon pag-put up ug pag-come up sa maong matang sa mga TV SHOWS, aron ta pahibaw-on kinsay mabdos, kinsay amahan sa gisabak; kinsay nag-away, kinsay nagbuwag, ug kinsay nipuli ug kinsay gipulihan; kinsay gikiha, nganong gikiha; ug nganong miniwang, nganong mitambok; ug pila lang ka buwan gikan sa pagkasal, buwag dayon, ug uban pa.

What's wrong with all these? Of course, nothing is wrong with all these!. Kaayo ini, ah! After all, negosyo ning tanan. Bahala nag unsay epekto niini ngadto sa atong mga batan-on, diin maoy gihimo nilang mga idol ug mga hero ang maong mga personalities nga nagduwaduwa lang sa kaminyoon ug sa ka-balaan unta sa pulong gugma,

Unya, tungod kay gipaka-bali-wala na man ang decency sa panapot ug gi-promote ang pre-marital sex, midagsang ang abortion, nagkadaghan ang mga matawo nga wa'ay klarong amahan ug inahan, nagkadaghan ang mga nabungkag nga mga banay, mga broken homes ug mga broken families.

Kini tungod kay sa atong makita sa mga cine ug television shows, nothing is wrong with changing wives or husbands, ug labaw pang nothing is wrong with teenage and pre-marital sex.

Kon nahimo kini sa atong mga idol sa kasinehan ug sa mga TV shows, nganong di man ni mahimo ni Segunda ug ni Segundo bisan kon anaa pa sila sa high-school?

Mangutana tag usab, Dro? Nganong ila man tang pahibaw-on kon kinsay namabdos ug kon kinsay tag-iya sa gisabak? Kinsay nagbuwag ug nganong nagbuwag? Kinsay gipuli sa gibuwagan, ug kinsay misawo sa mibuwag?

Nganong pangutan-on man ko ini nimo, Dro? Makapa-us-os ba ni sa presyo sa kamunggay?