Vigilantes!

Gikuyawan ko nga mapalpak na usab si Atty. Alex Tolentino sa gipasiatab niya nga imbistigasyon kabahin sa mga vigilantes nga giingong maoy responsable sa daghang pagpamatay dinhi sa dakbayan.

Taud-taud na nga gibutyag ni Tolentino nga nahibaw-an na nila kon kinsa kining maong mga sakop sa vigilantes. Tinuod nga makapaikag kaayo ang maong balita kay tiaw mo, nailhan na ang mga vigilantes.

Dili sayon ang pag-ila sa maong mga tawo, kana kon suportahan g'yod nila og mga ebidensya. Apan nasayod hinoon ko nga dili g'yod si Tolentino ang naghimo sa imbistigasyon.

Aw kay siya man maoy presidente sa Integrated Bar of the Philippines dinhi sa dakbayan, kon matinuod nga mailhan nila ang mga vigilantes, anha kaniya ang dungog kay gilupig nila ang kapolisan.

Ang naghimo sa imbistigasyon diha sa IBP, usa g'yod hinoon ka tawo nga ngilngig sa imbistigasyon. Saludo kaayo niining maong tawo ug sa iyang abilidad sa paghimo og pakisusi.

Tiaw mo, ang National Bureau of Investigation (NBI) gitahasan sa Department of Justice nga moabag sa paghimo og imbistigasyon, apan wala man gihapo'y resulta hangtud karon.

Miingon ko nga gipanguyawan kong mapalpak na usab si Tolentino sa iyang gipasiatab nga nailhan na nila ang mga vigilantes, kay dili kini sayon nga trabaho.

Basin baya og mahurot na lang ang panahon nga moingon siya nga paaboton lang nato ang tukmang higayon.

Dunay mga huwes nga nahinumdom nga wala pa man gani makapagawas ang IBP sa resulta sa ilang fact-finding inquiry kon sad-an ba ang mga tinugyanan sa BBRC niadtong daghang priso nga nakoryentehan ug namatay.

Kon dugay sila nga nakapagawas og resulta sa hilabihan kasayon nga matang sa imbistigasyon, mas dugay g'yod tingali kon maglambigit kini og kontrobersyal nga krimen.

* * *

Husto ang gihimo ni Mayor Thadeo Ouano nga wala niya dayona ang hulga nga parelibohan ang iyang hepe sa kapolisan tungod lang sa wala dayon masulbad nga pagpatay sa usa ka manager og bangko sa Mandaue.

Kon ingon na lang niini ang buhaton nga kon dunay dagkong kaso nga dili masulbad, walay molungtad nga mga hepe sa kapolisan. Mahimo usab nga maghimo-himo na lang ang kapolisan og mga scenario aron kunohay ingnon nga sulbad na ang kaso.

Ayaw kahadlok Mayor Teddy, kadtong pagpatay sa bank manager dili makadaut sa dungog sa Mandaue. Natumong lang nga ang biktima sa maong tulis usa ka manager og bangko.

* * *

Karong adlawa, ang sibyaanan DYLA magsaulog sa iyang ika-39 ka tuig nga sumad sa iyang pagkamugna.

Nagsugod pagsibya ang DYLA kaniadtong Septembre 27, 1967. Gitukod kini kaniadto aron pagpalambo sa tingog sa mga mamumuo.

Yukboan nako ang mga trabahador kaniadto sa Associated Labor Unions nga nagtampo-tampo og tag P20 gikan sa ilang sweldo aron idugang sa kantidad nga makapalit og kahimanan sa radyo.

Tuod man, wala makawang ang maayong plano nila ni Atty. Democrito Mendoza ug Atty. Cecilio Seno nga mamugna nila ang usa ka sibyaanan nga maoy modala sa tingog sa mga mamumuo.

Pagka karon, ang DYLA nagsibya na sa tumang katin-aw ug kalanog pinaagi sa makanunayong pagsuporta sa ALU-TUCP. Mabuhay ang DYLA!