EDITORYAL - Lakang batok sa spaghetti wires

Usa ka labing mangil-ad nga talan-awon (eyesore) sa dakbayan sa Sugbo mao kining mga nagkutaykutay nga mga alambre sa elekrisidad ug telepono nga gubot pa sa lukot (Ginganlan kini nga spaghetti wires).

Daghan nang nireklamo niini nga mga environment ug beautification advocates apan walay positibo nga resultado ang maong mga reklamo.

Karon milihok na ang usa sa mga konsehal sa siyudad. Si Konsehal Hilario Davide III, kinsa nakakita tingali sa kangil-ad nga tan-awon kining spaghetti wires, mipasaka og usa ka ordinansahon diin gidili ang pagpataka lag pakutay og mga alambre sa mga poste daplin sa mga dalan.

Maayo untag anaa sad sa maong ordinansahon ang kamanduan nga tarongon ug limpyohon sa mga kompaniya sa elektrisidad ug telepono kanang gitawag nga spaghetti wires nga nakahatag og kangil-ad sa talan-awon sa Sugbo sud na sa dugay'ng panahon.

Manghinaut kita nga tinud-on sa konsehal ang iyang tuyo sa pagpanindot sa atong dakbayan.