Vigilantes gihagit

Human tulisa ug patya ang tinun-an nga si Carmela Cabañog gumikan sa pagdumili niini sa paghatag sa iyang bag nga may sulod nga celphone samtang nagsakay sa sakyanang de pasaheroan, padayon gihapon nga misiaw ang mga tulisan sa ilang dautang kalihukan dinhi sa dakbayan. Kaniadtong miaging semana, lab-asera na usab ang gibirahan sa tulisan nga nakadala og 125 mil ka pesos. Gitulis usab ang laing tinun-an nga nagsakay gihapon og sakyanang de pasaheroan nga miresulta sa pagkalandig sa tambalanan sa usa ka laing pasahero nga nagpakabana human siya dunggaba sa dughan sa tulisan nga iyang gigukod.

Kining tanan pipila lamang sa mga tulis nga nagapanghitabo dinhi sa Sugbo. Dili na lamang nato tagsa-tagsaon kay di moarang ang tanan dinhi sa akong kolum.

Unsa may buot ipasabot niining misiaw nga krimin dinhi sa Sugbo sama sa mga pagpanulis nga diin ang mga tulisan dili na magpanuko sa pagpatay sa ilang mga biktima? Gihagit ba sa mga dautan o badlungon sa katilingban ang mga police sa Sugbo ug ang mga vigilantes?

Sa kaso ni Carmela mao lang ni ang akong masulti: Una, napakyas ang vigilantes sa ilang misyon pagpuhag sa mga badlungon sa katilingban ug ang ilang presensiya wala makapugong sa uban sa pagpadayon sa ilang pangitang naandan nga mao ang pagpanulis. Ikaduha, O basin wa lang gyod maato sa grupong vigilantes ang pagpuhag sa mga badlungon sa katilingban tungod sa ilang kadaghan. Ikatulo, mao nga ang sunod-sunod nga tulis resulta kini sa kapakyas sa atong kapulisan sa pagdakop ug pagtaral ngadto sa atong hukmanan sa mga kriminal nga gawasnong naglihok dinhi sa dakbayan.

Tungod sa kaso ni Carmela naumol ang atong mga kabalaka kon unsa ka luwas ang katawhang Sugboanon ug mga dumudoong sa kalihukan sa mga terorista. Kana tungod kay wa man gani makabantay sa kalihukan sa mga ordinaryong mga tulisan ang atong kapulisan unsa na kaha ngadto sa kalihukan sa mga terorista nga matud pa ni Secretary Norberto Gonzales hinay-hinay na nga nakasulod dinhi sa Sugbo.