Taxi gikan sa Korea di luwas?

Daling gitumbok sa kapolisan ug sa mga opisyal sa Mandaue ang giingong kakuwangan sa Gene's Laundry Shop sa pagsunod sa fire safety code hinungdan nga nahitabo ang trahedya niadtong Lunes sa buntag nga mikalas og duha ka mga kinabuhi og miangol sa 14 ka mga inosente.

Wa sunda sa management sa shop ang hustong lagda paggamit sa LPG hinungdan nga mihungaw hinungdan sa pag-ulbo. Nunot sa palpak sa management namiligro silang mag-atubang og kasong kriminal, reckless imprudence resulting to double homicide ug multiple physical injuries.

Apan, husto ba nga atong pun-an ang gidangatan sa tag-iya ug sa kawani sa laundry shop pinaagi sa pagkiha nila? Nganong ipasa sa mga opisyal sa dakbayan sa Mandaue ang ilang kaugalingong kapalpakan hinungdan nga nahitabo ang trahedya.

Simple lang ang pangutana nga angayang tubagon sa mga opisyal sa Mandaue? Una, nganong gitugotan nga makaoperate ang maong establisamento kung wa diay mosunod sa hustong lagda? Ikaduha, unsay gihimo sa mga inspectors sa Office of the Building Officials sa Mandaue? Ikatulo, niingon si City Administrator Serafin Blanco nga way business permit ang maong establisamento, nganong wa man pasirad-i?

Ang fire marshal sa Mandaue, Oscar Mayol, mitug-an nga ila nang girekomendar nga ibalhin ang mga tangke sa LPG, apan bisan pa sa nahibaw-an nang daan nga wa masubay sa lagda ang gihimo sa shop ila gihapon ning gihatagan og fire safety clearance.

Di kapanghunaw og tulobagon ang mga opisyal sa kabomberohan ug ang dakbayan sa Mandaue sa ilang kaugalingong kapalpakan. Busa, kon laraw sa kapolisan ang pagpasaka og kaso batok sa mga tag-iya ug kawani sa laundry shop mas maayong unahon nila pagkiha ang mga opisyal sa bombero ug dakbayan.

* * *

Duna tinuoy sukaranan ang publiko nga mabalisa sa seguridad sa mga taxi units nga migamit og LPG kay basin ug simbako kalit lang kining moulbo kon dunay hungaw ang tangke. Ang presidente sa Metro Cebu Taxi Operators Association nga si Richard Cabucos miingon nga luwas ang mga units nga gigamit sa ilang mga membro, apan di siyang kagarantiya sa mga second hand units nga gikan sa Korea.

Matud ni Cabucos nga ang Korea usa sa mga nasud nga unang migamit sa LPG, tungod sa pagdagsang sa mga surplus dinhi sa Pilipinas posibling dunay mga gigamit nga LPG kit gikan sa Korea nga gidala dinhi nga di na haum gamiton.

Kon mao ni ang sitwasyon angayan tinuod nga mabalaka ang mga sumasakay sa maong kasayuran.

* * *

Ang hitabo didto sa Mandaue nakapukaw di lang sa publiko sa kapilegro sa LPG kon di atimanon, apan lakip na sa mga ahensiya sa gobyerno. Ang DOLE pananglitan, matud ni regional director Elias Cayanong ilang tun-an ang posibilidad nga ilakip na ang mga laundry shop sa mga establisamento nga maisip nga piligroso.

Admitido siya nga wa gyud ni nila matagad tungod kay nagtuo sila nga wa ni'y kuyaw sa mga trabahante, apan tungod sa hitabo naglaraw sila pagpatawag sa tanang mga laundry shop operator aron tudloan sa hustong paagi paggamit sa LPG.

Mas hatagan sa DOLE karon og prioridad ang maong mga shops, lakip na ang mga restaurant ug bakery nga sagad mogamit sa LPG aron paglikay nga masubli ang hitabo sa Mandaue.

* * *

fplanguido@yahoo.com