Expansion sa mga airport

Nindot kaayong paminawon. Tiaw moy mugasto tag binilyon ka pesos aron palapdan ug ma-modernized ang atong mga tugpahanan sa eroplano dinhi sa mga lalawigan. Nindot no?

Ug kon molapad na ang atong mga airport dinhi, daghan nang mga eroplano ang manugpa dinhi ug sayon na kaayo ang atong travel to the provinces. Unya, makatugpa na ang mga dagkung eroplano nga maka-accommodate ug daghang pasahero. Nindot no?

Nindot gyud kaayong paminawon.

Apan, paminawa sad kono ni:

Gi-bring up ni Capt. Boy Oppus, ang unang airport manager sa MCIAA, atol sa usa ka tigum sa mga sakop sa AFRENA 7 kon Association of Former Regional Executives in Region 7.

Miingon siya nga okay, atong palapdan ang mga airport. Atong i-modernize. Mugasto tag binilyon ka pesos alang ning maong proyekto sa tibuok kapupud-an. Di lang ta magkwenta kon duna o pilay komisyon, kay wa tay labut niini.

Nia ang sitwasyon. Ibutang ta nga lapad na kaayo ang airport sa Zamboanga o sa Basilan. Ug ibutang ta nga modunggo na ang mga higanting eroplano, nga maka-accommodate og 500 ngadto sa 1000 ka pasahero.

Apan, gikan sa Zamboanga o sa Basilan, 20 o 60 da ka pasahero ang manakay. Pagkadakung alkanse. Ug kon ikaw ang tag-iya sa maong mga eroplano, nganong molupad ka man sa Zamboanga-Manila route?

Sa ato pa, alang sa maong mga dagkung eroplano, usa ka losing proposition ang pagpamasahero sa maong mga lalawigan. Sa ato pa, mahimong white elephant ang mga improvement nga gihimo niini.

Gi-think ba nig maayo sa atong gobiyerno? Nangutana si Capt. Oppus. Makaseguro ba sila nga tapus mapalapdi ang mga provincial airports, duna gyuy mga airline companies nga mobiyahe sa mga provincial routes?

Na-wa'a man gani ang mga fast crafts kay mahal kaayo ang maintenance ug dakung kuwang ang pasahero. Kahibawo man ka Dro, nga gumikan sa kalisud karon, kon mahimo langoyon lang sa mga Pinoy ang pag-biyahe-biyahe, aron makadaginot. Unya, mag-eroplano na hinoon? Sila rang mga Congressmen ang maka-afford niini!