Utang ray hinungdan

Walay magdahum nga mahupay ang branch ni Fortunato Sanchez sa iyang Gene's Laundry Shop diha sa Basak, Mandaue.

Samot nang wala magdahum si Diosdada Jao, 48, nga didto ra siya mamatay atubangan sa laundry shop ni Sanchez.

Ang tanang nahidangatan bunga sa pagbuto sa tangke sa liquefied petroleum gas (LPG) nga gigamit ni Sanchez sa pagpanglabada nahitabo sa usa lamang ka pagpamilok sa laing namatay nga si Felipe Hermoso ug niadtong 16 ka tawong naangol, lakip na ang batang gamay.

Didto matutok ang tanang pagbasol sa kadanghag ni Lorna Mercy Robin. Bisan natimahoan na niya ang baho sa LPG, unya nasayod siyang adunay mga tangke sa LPG nga gigamit sa negosyo sa iyang amo, mipadayon siya pagpaandar sa washing machine.

Apan dili makiangayon kun adto lang itulisok ang tanang tudlo ngadto ni Robin. Maayong pangutan-on usab ang iyang amo nga si Sanchez kun aduna ba kini gisunod nga mga 'safety measures' sa iyang pagpadagan sa negosyo ginamit ang LPG.

Bisan ang elementary pupil nasayod unsa ka-risgo ang paggamit og LPG. Ang mga inahan sa panimalay kanunay'ng nagmabinantayon sa ilang pag-operate sa gas stove paglikay sa aksidente gamit ang LPG tank.

Daghan nang higayon nga adunay manghitabong sunog nga ang pasanginlan mao ang leak o hungaw sa LPG nga wala matarong og sirado.

Kun adunay liki ang tangke sa LPG, siyempre gas gud ang sulod niini mangita gyud og kaagian aron mosagol sa hangin sa palibot.

Sama sa nahitabo sa Gene's Laundry Shop, nagpuot ang gas sa sulod sa maong establisamento. Giangkon ni Robin nga nakatimaho siya sa gas apan gibalewala lang niya kini hangtod nakadungog siya og sipa kaayong buto ug pagmata pa niya, naangol na siya.

Kay nagpuot na ang gas, gamay nga spark momugna na og kalayo sa sulod. Tungod kay nagtipon man sa usa ka luna nga walay kahungawan sa gas pun-an pa sa pipila ka laing tangke sa LPG, mobuto gyud kini.

Gihunahuna kaha kini ni Mr. Sanchez?

* * *

WARNING. Naigo na sa kilat una pa nakapanguros.

Mao kini akong reaksiyon sa pagkara-kara karon sa Department of Energy regional director Oscar Labios nga mosusi sa nahitabo sa Gene's Laundry Shop.

Kun gihimo pa unta sa DOE ang trabaho niini pag-monitor sa mga kompaniyang namaligya ug nang-apod-apod sa kamerkadohan sa mga LPG aron kalikayan ang pagbaligya sa mga liki na ug depektosong tangke sa LPG, wala untay sama ka dako nga danyos nga maangkon ang laundry shop.

Unya na magkarakara kun may nahitabo na.

Busa, kitang mga adunay mga tangke sa LPG sa panimalay nga gigamit sa pagpanglung-ag, kita na lang ang mohatag og warning sa atong kaugalingon gamit ang kasinatian sa Gene's Laundry Shop.

Dili na lang nato saligan kanang pulpol nga ahensiya sa kagamhanan nga wala gyuy nahimo pagpahamtang og bisan na lang 'information drive' ilabi na karon nga nagkadaghan na ang nanggamit niini.

* * *

LINE UP. Nangreklamo ang mga polis nga gipatawag sa miaging hapon sa Provincial Investigation and Intelligence Bureau (PIIB) alang sa usa ka police line up aron tudloon sa saksi sa pagpatay sa tigpatanto ni Pilar Hernandez asa nilang tanan ang mamumuno sa tigpatanto.

Usa ka pagpaka-ulaw ang gihimo ngadto sa mga polis nga gipa-linya aron tudloon sa saksi.

Unsa may gikahadlokan sa mga polis kun dili sila ang nagpatay kang Hernandez? Ingon ana usab bitaw ang ilang himuon sa higayon nga adunay mga suspek nga ilang pangpik-apon aron palinyahon aron ipatudlo sa saksi nga nangangkon adunay 'positive identification' sa kriminal.

Wala bayay problema ang maong police line up sa mga polis. Unsaon ta man nga sila man ang suspek kay sila man ang tig-utangan sa lending firm nga gidumala sa namatay'ng tigpatanto.

Usa pa, mando pa gyud kadto ni Police Regional Office-7 Director Silverio Alarcio Jr. nga palinyahon kadtong mga polis kang kansang apelyido o ngalan duol sa nalitok ni Maam Pilar sa wala pa kini mabugtoi sa gininhawa.

Ang nakalawgaw lang kay nganong si Supt. Juanito Enguerra, hepe sa PIIB, nang-imbitar og mga sakop sa media atol sa iyang pagpa-line up sa mga polis.

Sa akong nabatian, wala mangreklamo ang mga polis nga gipa-line up sila. Ang ilang gireklamohan ngano adunay mga sakop sa media, unya aduna pa gyuy mga photographer nga nagsige og pangodak nila.

Self-incriminating na gani kaayo ilang gibuhat, pun-an pa gyud og pakaulaw.

Grabeha sab niining Enguerra, sa iyang tinguha nga maka-papel sa imbestigasyon bisan ang lugar nga nahitabo wala sa probinsiya kun dili diha sa Tejero nga hurisdiksiyon sa Cebu City Police Office, nabulabog na hinuon ang imbestigasyon.

Tan-awa, Sir Enguerra, sa imong tinguhang pagpa-guwapo diha sa media, walay maayong nasangpotan sa imong police line up.

Lain nakong kahibulong, wala gyuy nailhang suspek hangtod karon.

Polis man gud ang suspek. Unya dili ordinaryong hitabo lang. Utang ang hinungdan.

Ngil-ad kaayo paminawon kun mahibaw-an nga polis ang namusil-patay sa tigpatanto unya maong mipatay ang polis kay dili na makabayad sa utang.