Ang hambog ni Corpus

Gisinggit ni Sr. Supt. George Corpus, director sa Criminal Investigation and Detection Group 7 nga adunay 18 ka mga kompanya dinhi sa Sugbo ang gipangayoan og revolutionary tax sa mga NPA. Iya usab nga giapil sa pagsinggit nga ang mga legal fronts sa NPA mao ang nakapahimulos sa revolutionary tax nga nakolekta sa mga NPA gikan sa mga negosyante. Aduna usab kunoy tulo ka mga party-list representative nga naghatagan og suporta sa mga NPA gamit ang ilang mga Community Development Fund kon CDF. Kining tanan nga kasayuran ilaha kuno nga nakuha gikan sa duha ka mga revolutionary tax collector nga ilang nadakpan kaniadtong Agosto 31 didto sa siyudad sa Talisay nga sila si Gerard Lavadia ug Sharon Abangan.

Kining maong kasayuran nga gipanghambog ni Sr. Supt. George Corpus dako kaayo kini og ikatabang sa pagtaral ngadto sa hukmanan sa duha ka NPA nga karon nag atubang na og kaso sa piskaliya sa siyudad sa Talisay. Pero ang pangutana, giunsa man pagkuha ni Corpus ug mga kaubanan kining maong kasayuran? Boluntaryo ba kini nga gihatag ni Lavadia ug Abangan ngadto sa mga imbestigador sa CIDG o pugos ang pagkuha niini? Wa ba manglaktod ang CIDG 7 sa mga proceso nga angayang sundon sa mga imbestigador sa mga himoong imbestigasyon ngadto sa mga tawong dinakpan? Kon ugaling boluntaryo man nga gihatag kining maong kasayuran ni Lavadia ug Abangan ngadto sa imbestigador sa CIDG 7, gipahibalo ba sila sa wa pa sugdi ang imbestigasyon nga aduna silay katungod sa pagpakahilom ug pagkuha og abogado nga maoy makatambag kanila atol sa imbestigasyon? Kon gipahibalo man ang duha ka dinakpan niining mao nilang katungod sa pagpakahilom ug pagkuha og abogado, gipasabot ba kini pagmaayo sa mga imbestigador ngadto kanila ni Lavadia ug Abangan? Kon boluntaryo man nga gihatag sa duha kining maong kasayuran, diha ba ang ilang abogado sa dihang gihimo nila kini ug gipaubos ba kini sa kasulatan?

Kon dili boluntaryo ang paghatag ni Lavadia ug Abangan niining kasayuran nga gipanghambog ni Corpus, nagpasabot ba kini nga gidagmalan sa mga imbestigador ang duha aron motug-an kini sa ilang nasayran hinungdan nga adunay bukol ang agtang ni Abangan sa dihang gipresentar kini ngadto sa gobernador ug sa mga sakop sa media?



Kon wa mosubay sa patakaran sa atong batakang balaod ang mga imbestigador sa CIDG 7 sa dihang ilang gihimo ang imbestigasyon ngadto ni Lavadia ug Abangan, way pulos ang nakuha nga mga kasayuran nga gipanghambog ni Sr. Supt. George Corpus kana gumikan kay dili kini mahimo nga dawaton sa atong hukmanan kay nakalapas kini sa patakaran nga gisita sa atong batakang balaod mahitungod sa pagpahigayon ug mga imbestigasyon. Tungod sa ilang pagpanglaktod, ang mga kasayuran nga gisinggit ug giladlad ni Sr. Supt. George Corpus ngadto sa katawhang Sugboanon dili kini magamit nga ebidensiya batok ni Gerard Lavadia ug Sharon Abangan hinoon magamit pa kini ni Corpus sa pagpanghambog ngadto sa iyang labaw.

Mas labaw pa gayod nga dili dawaton sa atong hukmanan ang mga ebidensiya nga nahipos sa pugos nga paagi sama sa pagpasakit o pagdagmal ngadto sa mga giimbestigahan.