Purga sa City Hall

Pipila ka adlaw sa wa pa ilusad ni Cebu City Mayor Tomas Osmeña ang Gubat Batok Bitok, gipasidan-an siya sa iyang asawang si Margot nga angay siyang mangandam sa mas dakong gimbuhaton kay sama ra nga nag-abli siya og higanteng kahon sa, nakatag-an mo, bitok. Matud ni Margot ang pagpurga sa dul-an sa 100,000 ka mga tinun-an sa tanang mga tulonghaang publiko sa dakbayan niadtong Biyernes mahimong makaiban apan di hingpit nga makasulbad sa nagbuntaog nga suliran.

Karong napurga nang mga bata, naneguro si Margot nga mas maklaro ang dugay-nang-nahibaw-an-apan-hangtod-karon-wa-pa-matubag nga managkaluhang hinungdan sa kahugaw sa labing kabos nga kabalayan: Ang kakuwang sa mga pansayan ug suplay sa luwas nga tubig nga ilimnon. Nipasabot si Margot nga way kapuslanan ug usik-usik lang sa kuwarta ug panahon ang Gubat Batok Bitok kon di kadasonan sa City Hall ang mas batakan apan mas gastusong kampanya sa pagpanlimpiyo sa palibot.

* * *

Atol sa iyang pagtambong sa Kulokabildo.Com sa Ayala Activity Center, ang Unang Ginang sa dakbayan nitambag sa katawhan nga di angay'ng ikauwaw ang pag-angkon nga dunay bitok ang ilang mga anak kay mao ni ang unang panginahanglan sa sayon ra kaayong pagtambal sa sakit. Si Margot niasoy nga puwerte sab niyang uwawa niadto dihang nadiskubrehan nga may bitok ang bugtong nilang anak nga si Miguel. Gibasol niyang iyang kaugalingon nga nagpabaya sa pagbantay sa kahimsog sa gamay pa niyang anak.

Hangtod nga nakaamgo nga bisan sa siya pa say bata, bisan wa magkuwang sa pansayan ug limpiyong tubig ang ilang pinuy-anan, ang iyang inahan napul-an sab og badlong sa iyang paghamong sa baba bisan unsay makuptan ug pagsige og pahinumdom sa pagsige og panghunaw, labi na sa di pa mokaon.

Di monopoliya sa mga bata ang bitok. Ang pagtuon ni Dr. Vicente Belizario Jr. sa National Institute of Health (NIH) nagbutyag nga labing menos 10% sa mga dagko dunay bitok. Kay bisan ang mga dagko may taras sa pagbutang sa ilang mga kamot sa ilang mga baba bisan way hunaw.

* * *

Gawas nga gidasonan dayon ang kampanya nga gisugyot nilang Belizario ug City Planning Officer Paul Villarete, si Mayor Osmeña maoy nag-una pagtomar sa purga pagpangabot gyod sa mga tabletas sa City Hall. Ang mga kawani sa iyang buhatan iya sang gipanghatagan aron pagpadangat sa mensahe nga bisan ang mga dagko di angay'ng mauwaw nga moangkon sa kamatuoran nga mahimong duna sab silay bitok.

Kapin sa 5,000 ka tabletas ang sobra sa lapad nga pagpamurga niadtong Biyernes. Nisugyot si Villarete ngadtong Osmeña nga purgahon sang tanang kawani sa City Hall. Kon malaumon ni Cebu City Schools Division Supt. Leonilo Oliva nga modako ang grado sa napurgang mga bata, nangandoy sang Sugbuanong mga magbubuhis nga mas abtik nang molihok ang mapurgang mga kawani.

* * *

Email: [email protected]