Duha ka bersiyon

Niang bersiyon sa duha ka gipasanginlang mga sakop sa mga rebeldeng komunista nga nadakpan sa militar ug kapolisan sa merkado sa Tabunoc, Talisay City niadtong Biyernes sa niaging semana nga ilang gitug-an sa ilang kaubanan sa militanteng mga pundok:

Silang Gerald Lavadia ug Sharon Abangan nanakay og taxi gikan sa Dakbayan sa Sugbo paingon sa Tabunok kay nagkasabot nga adto magsulti mahitungod sa laraw ni Abangan nga mobalik sa organizing sa hut-ong sa mga mangingisda. Pagkanaog nila sa taxi, gibanabanang 50 ka mga polis ug mga sundawo nag-alirong na nila, nisikop nila, gikuha ang ilang kabtangan, gitaptapan ang ilang mga mata, gipasakay sa laing sakyanan, gibalhin-balhin sa lainlaing mga sakyanan samtang gituyo pagsaag sa tinuoray nilang gipadulngan.

Kon tuohan ang ilang sugilon, ang dakong kuwarta, laptop computer, mga armas ug granada nga giingon sa mga imbestigador nga nakuha gikan nila pulos butang-butang lang sa kagamhanan.

* * *

Kon tinuod ang sulti sa duha ka dinakpan atol sa pagduaw sa ilang kapamilya ug kaubanan sa bag-ong bilanggoan sa Maghaway, Talisay, si Senior Supt. Jose Jorge Corpuz, hepe sa RCIDU 7, maoy namakak. Kapasanginlan si Corpuz naghimuhimo og iyang kaugalingong mga sugilanon aron pagpaburot pag-ayo sa implikasyon sa pagkasikop nilang Lavadia ug Abangan nga nangahas na gani siya pagsumpay sa ilang kalihokan ngadto sa giingong mas dakong pangandam paggubot sa Asean Summit nga ipahigayon dinhi sa Sugbo karong Disyembre.

Mahimo ganing si Corpuz ug ubang mga opisyal sa militar ug kapolisan igo lang nipahaom sa ilang mga pasangil batok nilang Lavadia ug Abangan sa mga detalye nga nahimutang sa giingong suwat-pangilkil nga nadawat sa kadagkoan sa Taiheiyo Cement Phils. Inc. sa San Fernando sa habagatang Sugbo gikan sa National Democratic Front (NDF). Segun sa duha ka dinakpan ang bugtong kasayuran nga nakuha ni Corpuz gikan nila mao rang laraw sa Bayan pagpasiugda og summit sa kalibotanong militanteng mga pundok nga iatbang nila sa Asean Summit.

* * *

Apan duna koy buslot nga nabantayan sa bersiyon nilang Abangan ug Lavadia: Kon tinuod nga sila rang duha ang nagkasabot nga magtagbo sa merkado sa Tabunok, nganong andam na man kaayong 50 ka polis ug mga sundawo nga nag-atang sa ilang pag-abot? May lain bang nahibawo sa ilang sabot ug maoy nakapindot sa militar ug kapolisan? O posible ba kaha, ug hinaot nga di sila magsinumbagay sud sa bilanggoan, nga usa nila maoy espiya sa kagamhanan?

Sa pikas nga bahin, ang bersiyon ni Corpuz wa sab kalawata sa ubang mga opisyal sa kagamhanan. Si Koronel Jefferson Omandam, tigpamaba sa Central Command, nga sama ni Corpuz dinapit sa Kapamilya Media Forum sa DYAB Abante Bisaya ug Sky Cable sa SM City Entertainment Plaza, kumbinsido nga ang kalihokan nilang Abangan ug Lavadia way direktang kalambigitan sa ASEAN Summit.

* * *

Email: leo_lastimosa@abs-cbn.com