EDITORYAL — Mga taas nga paril susihon

Ubay-ubay nang mga konkretong paril ang nangatumpag diin adunay pipila ka mga kinabuhi ang nakalas. Ang uban niini anha nahimutang daplin sa sapa, sama niadtong nahugno nga paril sa Mabolo diin unom ka tawo ang namatay.

Dili pa sad dugay duna na say laing paril nga nikolaps diha sa Nivel Hills.

Di ba kaha maayo kon ang mga tag-as nga konkretong paril susihon sa engineering authorities labot sa kalig-on niini, ilabi na kadtong mga paril nga dugay nang gipabarug ug gani napasagdan na lang.

Sumala sa usa ka construction engineer nga atong nahinabi, dunay posibilidad nga mag-weaken kun mohuyang ang pundasyon sa konkretong paril kun dili lig-on ang pagtukod niini.

Husto man o dili kining maong enhinyero maayo gyud nga hatagan og pagtagad ang iyang gisulti.