Mga samokan sa cellphone

Dili malalis nga dako kaayog kapuslanan ang cellphone. Pinaagi niini, mas madali ang pagpahigayon sa bisan unsang transaksiyon. Mas dali ang pagpakigkomunikar sa tawo nga tua sa layong dapit basta may signal lang aron pagpadayag sa atong tuyo. Mas sayon na ang pagpadangat og mensahe.

Pero duna usay mga disadvantage niining cellphone. Kini tungod kay gigamit man usab kini karon sa mga badlongon sa katilingban sa paghimog binuang ngadto sa ilang isigkatawo. Midagsang ang text scam. Gawas niana, may mga tawong walay lingaw nga magsamoksamok sa uban pinaagi sa pagpadala og makadisturbo nga mga text messages. May laraw sa pagrehistro sa mga cellphone og SIM card aron masumpo kining maong binuang pero nagduhaduha ko sa kaepektibo niini.

Usa sa nabiktima niining makasamok nga text messages mi-text kanako nga nagkanayon: "Puyde ba nako ipapriso ning nagsigeg samok nako sa cellphone? Naa man koy address niya. O ba kaha tagaan lang ni siya og leksiyon aron dili mag-anad." -- 0927-8128466

I-refer kining maong problema ngadto sa NTC kay sila nay mohatag kanimog advice kon unsay tukmang lakang nga angay pagahimuon batok niining mga samokan sa cellphone. Posibleng masilotan kanang nagsamoksamok nimo kon mapamatud-an nimo nga siya gayod ang naghasol nimo. Hayan mapriso siya kon may lig-on kang ebidensiya. Apan ang labing maayo nga una nimong buhaton mao ang pagdangop sa buhatan sa NTC kay sila ang mas nasayod kon unsay angay nimong buhaton.

* * *

Sa laing bahin: "Naa koy problema bahin sa akong network kay magsigeg padala og logo, P2.50 each ang deduction sa load. Bisan dili i-save ang logo makuhaan gyod ang load. Ngano man ni? Kon i-cancel, mobalik lang gihapon." -- 0927-8596888 (August 16, 2006 -- 13:46:23)

Wala koy ideya kon unsay hinungdan niini tungod kay bisan ang mga network provider wala man ing klarong explanation mahitungod niini. Niay tinamban kong sugyot. Ilisi ang imong SIM ug likayi ang pag-text sa 3 o 4-digit number.

(Sumbong ug reklamo? Text sa 0910-8105522)