Taxi ug baha

Sa kasagarang higayon, ibaliwala na nako ang kamahal sa akong mabayran sa taxi gikan sa dakbayan sa Sugbo paingon sa akong gipuy-an sa Mandaue City. Naanad na siguro ko nga kabahin na sa akong budget ang paggasto alang sa taxi nga akong kasakyan gikan ug paingon sa akong gipuy-an. Adunay mga panahon nga dili nako kalikayan ang mobisita sa Sugbo aron makigtagbo sa akong mga higala, motan-aw og sine, mamalit og sinina ug ubang gamit sa panimay.

Apan ning bag-o, mas makahuluganon alang nako ang mosakay ug taxi bisan kung mahal ug usahay dugay ang biyahe. May mga higayon nga moabot og traynta minutos ang akong biyahe labi na kung mabiktima sa kahuot sa trapiko ang akong gisakyan diha sa Highway Seno sa Mandaue. Apan sa positibong pagtan-aw sa maong sitwasyon, mas mahatagan ko og igong panahon sa paghuna-huna sa daghang mga butang sa akong trabaho ug personal nga kinabuhi diha sulod sa taxi.

Samtang nagsakay ko og taxi ning tapos semana, akong gihunahuna ang nahitabong trahedya sa Sitio Sindulan, Barangay Mabolo, Cebu City kung diin tulo ka mga bata, ilang inahan, yaya ug paryente ang namatay human masudli og tubig ang ilang panimay tungod sa pagkaguba sa creek duol sa ilang dapit. Samtang niagi ko duol sa maong lugar, wala nako kalikayi nga mahimong emosyonal labi pa nga personal nakong nahinabi ang nailo nga haligi sa pamilya. Sa among katapusang pagkita, wala pa masayod ang amahan unsa-on pagbangon gikan sa pait nga kasinatian nga miabot kaniya ug sa iyang pamilya. Pagkalu-oy sa maong amahan nga karon nag-inusara nalang human ang makakugang nga trahedya.

Sa matag sakay nako og taxi, nahimo na nakong batasan nga makighinabi sa taxi driver. Mga pangutana sama sa pilay abangan sa iyang taxi, kumusta ang pasada sa maong adlaw ug asa nga dalan ang mas dili huot nga agian. Usa kadto sa mga higayon nga wala ko magtingong-tingog sulod sa taxi tungod sa kalawom sa akong gihunahuna. Matud nila, dili kalikayan ang pag-abot sa trahedya. Tinuod. Apan sigurado ko nga maibanan ang epektong hatod unya sa trahedya kung adunay pag-amping ug aksyon sa usa ka problema. Sa iyang emosyonal nga interview sa ABS-CBN News, panghina-ot sa haligi sa pamilya Balagapos nga magsilbi untang leksyon ang nahitabo sa iyang mga anak, asawa, yaya ug pag-umangkon pagpukaw sa publiko ug sa mga lokal nga opisyal nga ingon og sa nagpakabuta-bungol sa problema sa baha. Iyang panghinaot nga aduna untay maayong kapaingnan ang kamatayon sa iyang pamilya.

Samtang nagdagan ang taxi, nakaingon ko sa akong kaugalingon nga adunay punto ang maong amahan ug sa iyang gipakitang baruganan, nanghinaot ko makasugakod ra siya sa pagsuway nga iyang gihambin karon. Kasagaran sa mga reklamo nga ipadangat sa mga hingtungdang ahensya, unya na maaksyonan kung aduna nay kinabuhing nakalas o diba kaha gibunal-bunalan na og maayo sa media ang isyu. Aduna gani uban nga bisan pa og giunsa na pagpukaw ang ilang atensyon wala pa gihapon batia og kauwaw sa ilang pagka-iresponsable.

Nadisturbo ang akong paghunahuna sa problema sa baha sa dihang nangutana ang driver sa taxi kung moliko ba mi gikan sa highway paingon Barangay Canduman sa dakbayan sa Mandaue. Akong giingnan ang driver nga moliko siya paingon Canduman ug moliko siya sa wala sa unang eskina nga among maabtan. Tuod man, gisunod sa driver ang akong gisulti. Nakahibawo ko nga husto ang among giagi nga dalan tungod kay nakamatikod ko nga nag-untol-untol na ang taxi. Sa maong punto, wala maka-agwanta ang driver ug nakapangutana gyud kung sigurado ba ko nga dalan ang among gisudlan o sapa nga naughan.

Buot ko nga mauwaw sa pangutana sa driver apan wala koy mahimo kay igo lang siyang nagsulti sa iyang naobserbahan. Ang wala mahibaw-i sa driver, mas grabe ang maong dapit kung mobunok na ang uwan. Wala siya mahibawo nga ang ingon og sapang naughan, taga tuhod ang tubig sa matag bunok sa uwan.

Sa matag higayon nga manglutaw na atong mga gamit, mangabasa atong sapatos ug karsones, mangaguba atong mga appliances ug mangasakit ang mga bata, ato ba sab nga gi-huna-huna unsa ka luwas ang mismong atong mga kinabuhi sa matag buhos sa uwan? Ug nag-huna-huna ba usab kaha ang mga hingtungdang ahensya unsaon pagsulbad ang problema sa baha diha sa atong mga nataran?