101 porsiyentong pagpabaya

Midangop sa imbestigador program sa DYSS Super Radyo Cebu ang mga ginikanan ug magtutudlo sa Grade V section 11 sa San Nicolas Elementary School kini human molabay ang tulo ka bulan gikan sa pagsugod sa klase nga wa gihapoy magtutudlo nga nagtudlo sa ilang mga anak sa subject nga Math ug Science.

Nabalaka ang mga ginikanan kon unsay makat-onan sa ilang mga anak (nga anaa sa special class) sa subject nga Math ug Science nga nahuman na man lang ang first grading period apan wa gihapoy nagtudlo niini. Ang mga bata usab nga nahinabi sa Balitang Bisdak mitug-an nga kay wa silay magtutudlo ang ilang himoon mao lamang ang pagsaba-saba ug pagsugal.

Matud pa sa magtutudlo nga si Daniel James Calo Marquina nga ang maong suliran kaniadto pang Hulyo niya gipaabot ngadto sa ilang prinsipal nga si Dr. Erlinda Melgo apan igo lamang kuno siyang giingnan niini nga pabuhat-buhatan lamang og grado ang mga tinun-an.

Pinaagi sa imbestigador program gipaabot ngadto kang Dr. Leonilo Oliva, Cebu City School Division Superintendent kining maong suliran kinsa mipasalig usab sa paghikotar gilayon sa nahisgutang suliran sa mga ginikanan.

Samtang gipasabot usab ni Melgo nga usa lamang ka miscommunication ang maong suliran.

Nakadayig ko sa dinaliang sulbad nga gihimo ni Dr. Leonilo Oliva sa nahisgutang suliran pero ang wa nako mauyoni mao ang gisumbong sa magtutudlo nga si Marquina.

Matud pa sa batan-ong magtutudlo nga gibasol siya ni Dr. Oliva ug ni Dr. Melgo sa iyang pagdangop sa media sa nahisgutang suliran. Gani gimahayan pa siya ni Dr. Oliva ug giiingnan nga may pa wa siya dawata.Tungod niini naglaraw ang magtutudlo sa pag undang na lamang sa iyang trabaho.

Unsa ba diay patakaran nga gipatuman sa buhatan ni Dr. Oliva ? Silutan ug pakasad-on kadtong magtutudlo nga magpakabana sa kahimtang sa mga tinun-an? Ang pagka way magtutudlo sa subject nga Math ug Science ngadto sa mga tinun-an nga anaa sa special class sulod sa tulo ka buwan 101 porcento nga pagpabaya sa buhatan sa prinsipal nga si Dr. Melgo. Sayod ang buhatan ni Dr. Oliva ug Dr. Melgo unsa ka importante ang subject nga Math ug Science ug labaw sila nga nasayod nga ganoyonon ang mga tinun-an nga anaa sa special class tungod kay mga slow learners kini apan ila na hinuon kining gipasagdan inay kay unahon sa pag-atiman. Hinuon ang principal adunay nahuna-hunaan nga solbad sa suliran, himo-himoan lamang og grado ang mga tinun-an. Seguro para kang Dr. Melgo importante ang grado kay sa kahibawo. Pero angayan nga hinumduman ni Dr. Melgo nga ang grado sukdanan lamang sa kahibawo busa importante ang kahibawo kay sa grado. Si Dr. Melgo dili angayan nga tawgong doctor kon wa siya masayod niini.

Laing 101 porsiyento nga pagpabaya ni Dr. Melgo mao ang wa pagkasayod niini sulod sa tulo ka buwan nga wa diay magtutudlo nga nagtudlo sa subject nga Math ug Science sa Grade V section 11 sa tunghaan nga diin siya mao ang principal. Diin man diay ka mag principal Dr. Melgo didto sa Timbokto? O kanunay ka lang nga naglok-lok sa imong buhatan ug nagpasinaw sa imong lingkoranan? Ug kay ang imong pagpabaya naabot sa media ug nabulgar imong mahayan ang batan-ong magtutudlo nga dapat gani unta imong pasalamatan? Para kang Dr. Oliva, ang dawaton ba nimong magtutudlo kadto lamang mga itoy andam ug tagana nga motilap sa imong lapa-lapa ug di kamaong magpakabana sa problema sa tunghaan diin ikaw maoy giilang amahan?

Para kang Daniel James Calo Marquina saludo ko sa imong gihimo. Ayaw pagluwat sa imong pagkamagtutudlo kay kon imo kanang pagahimoon, imong gitugutan ang pagpabaya sa imong mga labaw nga mopatigbabaw.