EDITORYAL - Pagpangandam vs. oil spill

Ang grabeng oil spill nga nahitabo sa kadagatan sa Guimaras gikahadlokan nga mokatag sa laing dapit lakip na ang mga dagat libot sa Panay ug Negros.

Gikahadlokan usab nga ang oil spill mokatag ngari sa Visayan Sea diin nahimutang ang amihanan nga dapit sa isla sa Cebu.

Kon mahitabo kini, bisan dili ka grabe ang gidaghanon sa oil spill sama sa Guimaras, maapektahan gyud ang panginabuhi sa mga namuyo sa coastal towns kon kalungsoran duol sa kabaybayonan.

Andam na ba kaha ang atong kagamhanan sa pag-atubang ug pagsagang sa giingong oil spill kun pananglitan -- simbako -- moabot ang maong katalagman dinhi sa atong dapit?

Duna pay panahon sa pagpangandam ug angay gyud nga sugdan na ang maong pagpangandam bisan tuod nga ang ubang eksperto nagtuo nga walay angay kabalak-an ang maong gipanglantawan nga hitabo.