Si Collector Ricardo Belmonte gipasanginlan nga maoy nimaniubra sa mga dokumento niining maong mga bugas aron makita kini sa publiko nga lihitimo pero sa pagka tinuod wala kini mobayad og buhis ngadto sa gobiyerno. Apan hugot nga gipanghimakak ni Collector Belmonte ang maong pasangil.
Matud pa niya nga tinuod nga adunay sobra sa 400 ka container vans nga karga ang MV Maas Traders apan 92 lamang ka vans niini ang adunay sulod nga mga bugas. Dili usab kuno tinuod nga adunay smuggling kana tungod kay mibayad ang importers og buhis ngadto sa gobyerno sa maong mga vans.
Apan kaniadtong Martes aduna akoy laing mensahe nga nadawat gikan sa usa ka nagpaila nga Blue Angel mahitungod gihapon sa palusot sa bugas. Sa mensahe nga iyang gi-email kanako iyang giingon nga gawas sa MV Maas Traders aduna pa diay laing barko ang miabot nga nagkarga gihapon og daghang sinakong bugas ug kini mao ang MV Mellin ug MV Lila Bhum. Karong semanaha laing barko MV Elena ang moabot nga nagkarga usab og lain pang mga smuggled nga mga bugas.
Sa kadaghang international vessels nga nangabot kaniadtong miaging semana nganong gamay man lamang ang import entries ang miagi sa Assessment Division sa Bureau of Customs. Matud pa ni Blue Angel nga gustong ipalutaw sa mga nalambigit sa palusot ang 92 ka container vans tungod kay mao lamang kini ang adunay PITC nga dokumento pero ang uban nga gikarga sa MV Mellin ug MV Lila Bhum misdeclared pa gihapon kini og nagpaabot lamang sa dako nga "Swing operation" nga pagahimuon kon ugaling wa nay magtan-aw niini. Ang "swing" sa customs nagpasabot og pagpalusot sa mga imported nga mga produkto diha sa Cebu International Port nga walay pag-agi sa saktong proseso ug pagbayad og buhis ngadto sa gobyerno.
Sa pagka karon aduna pay gatusan ka mga container vans sulod sa Cebu International Port ang nagpaabot lamang nga ipalusot aron dili kini makabayad og buhis ngadto sa atong gobyerno matud pa ni Blue Angel. Tinuod ni Collector Ricardo Belmonte?
Matud pa sa mga reporter nga nagcover sa buhatan sa bureau of customs nga government first ang patakaran karon nga gipatuman nimo Collector Ricardo Belmonte diha sa imong buhatan. Pero kon tinood kining gisumbong diri kanako ni Blue Angel murag mamatay ang gobyerno ning imong gihimo. Smuggler kuno ka collector! Tinuod ni?