Dakop gyod ha?

Kadtong mga cellphone subscribers nga padayong makadawat og mga promotional messages gikan sa mga network providers nga mahulagway nga nagsamok-samok lang, makahimo na karon pagreklamo.

Ang kadagkoan sa National Telecommunications Commission sa Manila, mipadala na og kamandoan sa lainlaing mga regional offices nga mugnaon sa ilang mga level ang text spam committee.

Gipahibalo ko kagahapon ni NTC regional director Danny Sy nga karong Martes - kay wala may trabaho sa Lunes - moisyu na siya og direktiba nga magmugna sa regional text spam committee dinhi sa Central Visayas.

Ubos sa kamandoan gikan sa NTC-Manila, ang regional director maoy magsilbi nga pangulo sa maong komitiba, ug ang hepe sa legal division maoy luyo-luyo, ug dunay usa ka laing sakop.

Maayo unta og mapakgang na kining mga binuang sa mga network providers. Tiaw mo, taliwala sa atong pagkatulog, mahaigking intawon ka kay mikalit lang og tingog ang imong cellphone.

Nagtoo ka nga importante ba kaayo apan, pastilan, usa ra man diay ka promotional message aron danihon ka pagpalit og ringtone, screen saver ug unsa pa na diha.

Duna ra bay network nga pwerte g'yod ka samokan. Kon dili ka magtagad, sigihan ka g'yod hinoon og padala sa maong mga mensahe. Kon motubag ka nga "No" lain na usab nga promotional ang ipadala nimo.

Ang buhaton sa mga gustong moreklamo, dad-on nila ang ilang cellphone sa NTC, aron makita kini sa mga sakop sa komiti. Dayon, ang komiti mopatawag sa kadagkoan sa network providers.

Hala, reklamo na mo!

* * *

May nangutana, kon ngano man diay tuod nga ang duha nato ka kongresista dinhi sa dakbayan - sila si kongresista Raul del Mar ug Antonio Cuenco - dili man modeposito sa ilang Countrywide Development Fund diha sa Cebu City Medical Center?

Mora'g tag P5 milyones ang gitagana nila ni Kongresista Del Mar ug Cuenco matag tuig isip ayoda sa pag-atiman sa panglawas sa mga kabus, apan didto nila gihatag sa Vicente Sotto Memorial Medical Center. Bi, palihug kuno, tun-i ninyo Sir.

* * *

Gipaspasan sa kapolisan sa Pardo ang pagpanakop sa mga dispatchers didto sa ilang dapit. Nindot kaayo ang ilang gihimo. Kining maong mga dispatchers, mahulog ra gihapon og mga tong collectors.

Managsama ra sila anang mga tawo nga magpatoo nga kunohay mga car watchers. Bisan og anaa ka ra diha sa duol nagbantay sa imong sakyanan, mangayo sila og bayad sa pagbantay.

Dunay usa ka car watcher o tong collector nga akong nakasab-an kay nagpataka lang og mandar sa pagpaatras, apan sayop kay dili diay siya maantigo nga mo-drive.

* * *

Nalipay ko nga nasayod nga dinakpanay na g'yod kuno ang gihimo sa mga sakop sa Citom nga manakop sa mga traysikad diha sa Pasil ug Taboan.

Hala, pirmiha ninyo Sir ha? Ayaw ninyo pangwartaha. Samok kaayo ning maong mga traysikad nga magbahis-bahis diha sa karsada nga wala itugot kanila.

Unya, ayaw'g hunungi didto sa dalan Katipunan ug Salvador, sakop sa Labangon. Grabeng daghanang traysikad uy nga anaa nagdagan-dagan sa maong karsada makasamok sa mga motorista.