Manyak si Kapitan?

Kaniadtong Martes sa gabii midangop sa akong tulumanon Saksi Evening Edition sa DYSS si Mrs. Carolina Mendicina nga nanag-iya og usa ka gamay nga tindahan sa pagkaon diha sa may Salinas drive ning dakbayan. Katuyoan sa iyang pagdangop sa atong tulumanon mao ang pagreklamo batok ni Kapitan Clemente Rosales sa Barangay Apas. Matud pa sa ginang nga kaduha matag semana pangayoan siya og pang gasolina sa kapitan. Gawas pa niini magpaputos usab kaniya og sud-an si kapitan unya dayong lakaw nga walay bayad-bayad. Kining tanan nagsugod kaniadto pang tuig 2002. Matud pa sa ginang nga iya lamang giagwanta ang gihimo sa kapitan ngadto kaniya tungod kay modayon man kini sa paghulga nga ipademolis ang gamay niyang tindahan nga anaa mahimutang sa kilid sa drug rehabilitation kon dili kini mohatag sa gipangayo. Gani matud pa ni Mrs. Carolina Mendicina nga dihay panahon nga giingnan siya sa kapitan nga adto na lamang siya patindahon sa may out post doul sa training center aron adto na lamang kuno siya kamanga ni kapitan Clemente Rosales. Ug kay wa siya mosugot sa kagustohan sa kapitan mao nga ipademolis na ang iyang tindahan karong adlawa.

Hugot nga gipanghimakak ni kapitan Clemente Rosales kining maong mga pasangil. Matud pa niya nga ato usab nga nahinabi sa samang tulumanon Saksi Evening Edition nga dili mahitabo nga mangayo siya og pang gasolina ngadto ni Mrs. Mendicina tungod kay adunay daghang gasolina ang iyang barangay. Gikataw-an lamang usab sa kapitan ang pasangil nga iyang pabalhinon pagpatinda ngadto sa out post doul sa training center si Mrs. aron didto iyang kamangon. Dugang pa usab niya nga dili siya ang nagpademolis sa tindahan kon dili si Mayor Tomas Osmeña tungod sa ASEAN Summit. Matud pang kapitan Rosales nga natural lamang kuno kining maong reaction niadtong mga tawo nga maigo sa demolisyon.

Si Mrs. Carolina Mendicina nagpatulo sa iyang mga luha samtang nagpaminaw sa mga pagpanghimakak nga giluwatan ni Kapitan ug sa padayon kong pagpakighinabi kaniya human sa akong interview ni kapitan Clemente Rosales iyang giingon nga si kinsa man kuno siya nga magtumo-tumo og istorya ngadto sa usa ka tinamod ug tinahod nga amahan sa barangay Apas.

Si Mrs. Mendicina igo lamang nakatong-tong sa ika-upat nga ang-ang sa elementarya ug produkto sa guba nga pamilya. Buwag sa bana nga nagbisyo ug adunay tulo ka mga anak. Duha sa iyang mga anak ang nagtungha sa kolehiyo sa kursong edukasyon ug nursing. Siya ang inahan ug amahan sa pamilya ug way laing gikuhaan sa ilang pagkaon ug pagpatungha sa iyang mga anak mao ang gamay nga tindahan nga ipademolis ni kapitan Rosales ning adlawa. 24 oras silang maninda ug magpuli-puli lamang sa pagbantay sa tindahan aron usab makapahulay ang matag usa kanila. Dili siya gusto nga mapariha kaniya nga walay grado ang iyang mga anak mao na nga iya gayong gipaningkamutan ang pagpatungha kanila bisan pa man kon naputos na siya sa utang. Gusto siya nga kuhaon sa kahitas-an ang iyang hinulaman nga kinabuhi pero unya na kuno kon iya nang makita ang iyang mga anak nga nahiluna ug nakahuman sa ilang pagtungha. Pero karon nga ipademolis na ang naghatag kanila og kapanginabuhian daw midat-og na kaniya ang tibuok kalibutan tungod kay segurado gayod nga maputol ang duha niya ka mga bata sa pagtungha.

Ang pangandoy ug tinguha ni Mrs. Mendicina naputol tungod kay wa siya mosugot nga makamang ni kapitan. Sa imong pangidaron kapitan puyde pa diay? Ang tigulang bisan bako maningkamot mobarog, motindog aron mangamang? Joke joke joke. . .