Padayon ang text scam

Dili kay kita ray naghatag og pasidaan ngadto sa publiko nga magbantay gayod batok sa text scam. Lakip ang National Telecommunications Commission (NTC), mga pribadong kompaniya sa komunikasyon ug ubang ahensiya sa gobiyerno mihatag usab og pasidaan sa katawhan nga dili gayod magpalingla sa mikaylap nga text scam.

Pero taliwala niining tanan, nagpadayon ang pagdagsang sa text scam. Nagpasabot lang kini nga nakailad pa gayod ang mga tawo nga responsable sa pagpasiugda niining maong binuang. Nagpakita lang kini nga wala pa gayod ma-aware ang tanan natong kaigsuonan mahitungod niining maong estilo sa modus operandi.

Usa ka magbabasa niining lindog mi-text nga nagkanayon: "Nakasulay na ko sa modus sa text sa cellphone. Ingon niini: 'Congrats! Your cell. no. had won P3 million during our anniversary charity foundation raffle draw. Call Atty. AAE (initial) at no. 0920-6581785. Call now to avoid forfeiture. Gipadad-an ko niini nga text karon lang gyod, July 22, 2006." -- 0918-2012620 (July 22, 2006--13:12:47)

Ang akong ikasulti mao nga ayaw kamog tuo niini. Ayaw gayod kamo pagtawag sa numero 0920-6581785 kay tingalig madala kamo sa bulatik sa naghupot niining maong cellphone ug mailad kamo. Ayaw kamo kabalaka sa giingong forfeiture. Labaw pang ma-forfeit ang inyong kuwarta kon magpadala kamo sa tinonto sa nagpaluyo sa maong text scam. Ayaw kamo pailad aron dili modaghan ang mga mangingilad. Kay lagi, dili moobra ang mga mangingilad kon walay magpailad.

* * *

Sa laing bahin: "Naa koy reklamo sa Smart. Nag-unlimited ko og 2 days. Naunsa man nga pag-expire sa akong unlimited giapil man pod og kuha ang sobra nga P28." -- 0910-7740904 (July 23, 2006 -- 09:57:37)

Mao kini ang makapahisagmuyo sa mga serbisyo sa Smart ug ubang network provider. Nindot silag mga tanyag. Ugaling lang kay kon mo-avail kita niini, magdulot man hinuon kinig kahasol kanato. Bisan ganig dili kita mo-avail sa ilang mga promo, maibanan gihapon ang atong load bisan wala nato gamita. Pait!

* * *

(Sumbong ug reklamo? Text sa 0910-8105522)