EDITORYAL — Adopt-a-school program

Dili ikalalis nga mubo kaayo ang kalidad sa atong mga public schools -- elementary ug high school -- kung itandi sa mga eskuwelahang pangpubliko sa ubang nasud sa Asia.

Usa sa mga hinungdan niini mao ang kakulang sa pundo nga gigahin sa kagamhanan alang sa edukasyon.

Si Kongresista Eduardo R. Gullas sa Unang Distrito sa Sugbo nakahunahuna og paagi sa pagsulbad niining maong problema.

Ang Sugbuanong kongresista nangamahan og balaudnon diin gimugna ang adopt-a-school program. Ubos sa maong programa, giawhag ang mga dagkong pribadong kompaniya sa pag-adoptar og eskuwelahan kang kansang mga panginahanglanon maoy motubag ang maong kompaniya.

Walay alkanse ang mga kompaniya nga mosalmot sa adopt-a-school program tungod kay ang makapahimus man sila sa tax deductions.

Apan ang labing mahinungdanon nga "ganti" nga mapupo sa maong mga kompaniya mao ang pagdayeg ngadto kanila tungod sa ilang pagtabang sulbad sa problema sa atong mga publikong tulonghaan.