E-mail scam gihapon

Daghang kaayohan nga atong makuha gikan sa internet. Una, daghang maayong mga impormasyon ug oportunidad nga atong makuha gikan sa internet. Mas dali ra usab ang atong pagpadangat og mensahe ug transaksiyon pinaagi sa e-mail. Ang subo palandongon mao nga ang internet gipahimuslan usab sa mga badlongon sa katilingban sa pagpahigayon sa daotan nilang modus operandi.

* * *

Daghan nang matang sa e-mail scams karon. Nakahisgot na kitag pipila niini apan nia pa gyoy lain. Kasagaran anha kini mosulod sa Bulk messages sa inyong mga e-mail accounts. Bantayanan kini tungod kay kun malingla kamo niini, seguradong masulod kamo sa laang sa mga badlongon sa katilingban.

Ang estilo mao nga may magpadala kanimog e-mail ug magpaila nga atua siya magbase sa Europe. Magpatuo siya nga konektado sa usa ka dakong kompaniya nga namaligya og mga laptop computers nga nagbase sa Amerika. Tanyagan ka niya sa produkto (kuno) nilang laptop computers nga barato ra. Kun kursonada ka, ipadeposito lang ang bayad sa usa ka designated bank account. Unya human (kuno) nimo madeposito ang kuwarta, patawagon ka sa nagpadala kanimo sa e-mail (may numero sa telepono nga ihatag ang suspek sa iyang e-mail) aron pagpahibalo kaniya nga natuman na nimo ang rekisitos kay ipadala na kuno kanimo ang imong gipalit nga computer unit.

* * *

Ayaw gayod kamog tuo niini. Delikado kaayo ang pagpakig-transact nga walay pormal nga kasabotan ilabi na kun maglambigit na og kuwarta. Mas kuyaw kun unahon nilag kuha ang bayad sa produkto sa walay igong garantiya nga segurado gayod nga modangat sa imong mga kamot ang produkto nga imong gipalit. Eksamina ug analisaha sab ang e-mail nga inyong madawat aron pagsuta kun angay ba kining tuohan.

* * *

Sa laing bahin: "Sa Smart bisan i-off pa ang celfone kuhaan gihapon ang load. Operator tingali ang mokuha. Maong dili na sad ta ganahan magpa-load." -- 0910-3718094 (July 24, 2006--22:57:17)

Dili lang una ta mamasangil kun kinsa gyoy responsable sa pagkuha sa mga load nga wala nato gamita. Basta angay gyong tul-iron sa Smart kining problemaha.

(Sumbong ug reklamo? Text sa 0910-8105522)