Mga hubog sa kadalanan

Adtong miaging Sabado sa gabii (Agosto 5), usa ka lalaking hubog ang miisa sa sayal sa babayeng naglakaw ug miagi sa iyang atubangan.

Pagkasunod gabii, laing lalaking hubog ang mitamparos sa usa ka batan-on kinsa nagdumili sa paghatag og P100 nga iyang gipangayo.

Kini duha lang sa mga panghitabo diin ang mga hubog nakahimog kasamok sa kadalanan pinaagi sa pagpanaghilabot niadtong mga buotang lungsuranon nga wala manghilabot kanila.

Daghan pang mga insidente diin ang mga hubog nagsamoksamok sa malinawon tang komunidad.

Aduna may ordinansa batok sa mga naghubog-hubog sa public places, nganong di man kini ipatuman sa atong awtoridad?

Dugay na kanang maong ordinansa nga gilawa-lawaan na lang. Mas maayo tingali nga haw-ason kini sa lawa ug abog ug implementahon ngadto sa mga naghubog-hubog sa atong mga pangpublikong lugar.